Прэм’ер Польшчы распусціў камісію па расследаванні беларускага і расійскага ўплыву

1 жніўня, Позірк. Камісія, што расследавала ўплыў Расіі і Беларусі на бяспеку Польшчы з 2004 па 2024 год, спыняе сваю дзейнасць, вынікае з распараджэння прэм’ер-міністра Польшчы Дональда Туска.

Дакумент, які быў падпісаны 30 ліпеня і набыў моц 31 ліпеня, апублікаваны ў афіцыйным выданні Polish Monitor.

Старшыня і сакратар камісіі будуць ажыццяўляць дзейнасць, звязаную са скасаваннем гэтай структуры да 30 верасня 2025 года.

Польскія СМІ адзначаюць, што за час працы камісія накіравала кіраўніку ўрада тры справаздачы: у кастрычніку 2024 года, а таксама ў студзені і красавіку 2025-га.

У першым дакуменце гаворка ішла пра шкоду, што нанесеная польскім выведвальным ды іншым сілавым органам. У гэтым кантэксце былі згаданыя закрыццё аддзяленняў Агенцтва ўнутранай бяспекі і ліквідацыя сакрэтных матэрыялаў Інстытута нацыянальнай памяці. Акрамя таго, у першым дакладзе адзначалася, у прыватнасці, што Антоні Мацэрэвіч, які ўзначальваў Мінабароны ў 2015–2018 гадах, пад уплывам Расіі мог здзейсніць “дыпламатычную здраду”, прыняўшы рашэнне пра выхад Польшчы з праграмы НАТО па сумесных закупках самалётаў-запраўшчыкаў у 2016-м.

У другім дакладзе гаворка ішла пра дзейнасць РФ і Беларусі пасля пачатку пандэміі COVID-19 у 2020 годзе, калі ў Польшчы нібы ўзрасла актыўнасць па распаўсюдзе дэзінфармацыі. У дакуменце зробленая выснова, што супрацьдзеянне дэзінфармацыйным пагрозам з боку Масквы і Мінска ў апошнія гады было недастатковым.

Змест трэцяга даклада не выдаецца.

Пра падрыхтоўку законапраекта, які прадугледжвае стварэнне канстытуцыйнай камісіі па расследаванні ўплыву Беларусі і РФ, Туск заявіў летась 10 траўня. Структура распачала працу 4 чэрвеня таго ж года, яе ўзначаліў кіраўнік службы контрвыведкі генерал Яраслаў Стружык.

У яе ўвайшлі ў асноўным эксперты з навуковымі ступенямі і званнямі: былы амбасадар Польшчы ў Аўстрыі, экс-амбудсмэн, прафесар Ірэна Ліповіч, прафесар Ягелонскага ўніверсітэта Дамініка Каспровіч, доктар філасофіі ў галіне сацыяльных камунікацый і медыя Катажына Банковіч, гісторык і палітагог, навук, сацыяльных навук спадчыны польскай нацыянальнай думкі Адам Ляшчынскі, дырэктар ваенна-гістарычнага бюро дацэнт Гжэгаж Матыка, доктар юрыдычных навук Цэзары Банасіньскі, былы амбасадар Польшчы ў Эстоніі і Славакіі, экс-кіраўнік місіі НАТО ў Маскве Томаш Хлонь, былы намеснік начальніка Агенцтва ўнутранай бяспекі Павел Бялек, прафесар Агнешка Дзямчук, спецыяліст па пытаннях супрацьдзеяння інфармацыі, доктар сацыяльных навук Павел Чаранек.