Дэпутаты абмяркоўваюць магчымасць дазволіць бацькам дзяцей-інвалідаў назапашваць дадатковыя выходныя
8 жніўня, Позірк. Наданне права назапашваць ільготныя выходныя абмяркоўваецца ў Палаце прадстаўнікоў Нацыянальнага сходу ў рамках планаваных змяненняў Працоўнага кодэкса, паведамляе прэс-служба ніжняй палаты парламента.
Згодна з дзейным заканадаўствам, гэтыя выходныя назапашваць нельга, аднак у парламент паступіла прапанова пашырыць гарантыі, якія тычацца надання дадатковых аплатных выходных дзён работніку, які выхоўвае дзіця-інваліда.
У Палату прадстаўнікоў таксама “паступілі прапановы па ўдасканаленні норм, якія тычацца падстаў скасавання працоўнага дагавора з работнікам (у сувязі са змяненнем месца жыхарства, выхаду на пенсію, знаходжання на бальнічным больш за 4 месяцы)”. Пра якія менавіта прапановы ідзе гаворка, не ўдакладняецца.
Прапануецца таксама ўдасканаліць кантрактную форму найму — скасаваць працэдуры падаўжэння кантрактаў у рамках пяцігадовага тэрміну дзеяння, вызначыць парадак надання дадатковых мер стымулявання (заахвочвальных адпачынкаў і даплат за такую форму найму).
Цяперашняя практыка такая: нават калі кантракт заключаецца на максімальны тэрмін — пяць гадоў, то наймальнік павінен штогод яго падаўжаць, афармляючы дадатковае пагадненне. Такая працэдура, як адзначаецца, стварае адміністрацыйную нагрузку, а ў работнікаў з’яўляецца няўпэўненасць.
Дзейны Працоўны кодэкс прыняты 26 ліпеня 1999 года, набыў моц 1 студзеня 2000 года. Апошнія змены ўносіліся ў 2023 годзе і пачалі дзейнічаць 12 ліпеня 2024-га (частка палажэнняў — 1 студзеня 2025 года).
Ключавыя новаўвядзенні ў ПК уключаюць права заключаць працоўны дагавор у электронным выглядзе праз сістэму электроннага дакументаабароту, абавязковае прапісванне крытэрыяў ацэнкі работніка падчас выпрабавальнага тэрміну.
Працадаўцаў таксама абавязалі публікаваць вакансіі ў адкрытых крыніцах, каб забяспечыць кандыдатам доступ да інфармацыі.
Пашыраныя падставы для звальнення з ініцыятывы працадаўцы. Сярод іх, напрыклад, страта даверу і парушэнне працоўнай дысцыпліны.
