Беларусь перадала пацярпелай ад паводак Кеніі гуманітарны груз — адзенне, абутак і намёты
Дзмітрый Красоўскі і Ісмаіл Маалім Мадэй
12 сакавіка, Позірк. Беларусь перадала Кеніі гуманітарны груз масай 7,5 тыс. тон, кошт якога перавышае 500 тыс. рублёў (каля 171 тыс. долараў), паведамляе прэс-служба беларускага Міністэрства замежных спраў.
Паводле інфармацыі ведамства, дапамога аказаная на даручэнне Аляксандра Лукашэнкі для барацьбы з цяжкімі наступствамі паводак.
“Беларускі бок накіраваў адзенне і абутак для дзяцей і дарослых, а таксама каркасныя намёты”, — гаворыцца ў паведамленні.
Цырымонія перадачы грузу адбылася 12 сакавіка ў прысутнасці амбасадара Беларусі ў Кеніі Дзмітрыя Красоўскага і намесніка міністра грамадскіх паслуг, развіцця чалавечага капіталу і спецыяльных праграм Кеніі Ісмаіла Мааліма Мадэя.
У гэты ж дзень дыпламат сустрэўся з намеснікам міністра замежных спраў і дыяспары Кеніі Абрахамам Карырам Сінгаэем.
“Суразмоўцы абмеркавалі стан і перспектывы развіцця беларуска-кенійскіх стасункаў, уключаючы падрыхтоўку двухбаковых візітаў на найвышэйшым і высокім узроўні, а таксама пытанні ўзаемадзеяння ў рамках міжнародных арганізацый”, — паведаміла беларускае знешнепалітычнае ведамства.
