29 жніўня, Позірк. Пасля інцыдэнту з дронам “Гербера”, які прыляцеў на тэрыторыю краіны, Літва перакінула сістэмы СПА блізкага радыусу дзеяння бліжэй да мяжы з Беларуссю, заявіў начальнік Генштаба арміі гэтай балтыйскай краіны Раймундас Вайкшнарас.
Паводле яго слоў, якія перадае партал Delfi, калі б беспілотны лятальны апарат “Гербера” зноў парушыў паветраную прастору Літвы, “яго б хутчэй выявілі, і ён быў бы знішчаны”.
“На вільнюскім кірунку мы ўзмацнілі пільнасць і магчымасць знішчаць не за хвіліны ці гадзіны, а за секунды (у залежнасці ад сітуацыі) пры прыняцці рашэнняў”, — сказаў кіраўнік Генштаба.
Гаворачы аб сумесных расійска-беларускіх вучэннях “Захад-2025”, ён адзначыў, што правакацыі ў гэты перыяд на літоўскай тэрыторыі “малаверагодныя”.
“Хачу супакоіць людзей: на сённяшні дзень няма сур’ёзных рызык”, — падкрэсліў Вайкшнарас.
Паводле яго сцвярджэння, падчас згаданых вучэнняў у Літве, Латвіі, Эстоніі і Польшчы напагатове будзе блізу 40 тыс. вайскоўцаў — “усюды, не толькі на сушы, але і на моры, і ў паветры”. “Думаю, гэтай колькасці <…> дастаткова, нават калі адбудуцца правакацыі, што малаверагодна. Але мы павінны быць пільныя”, — дадаў Вайкшнарас.
Увосень літоўскае войска возьме ўдзел у вучэннях “Гром Пяркунаса”, у рамках якіх буддзе адпрацаванае “аператыўнае планаванне”, а таксама праведзеныя “палявыя тактычныя вучэнні ў адпрацоўцы навыкаў кіравання на розных узроўнях і інтэграцыі рэзервістаў у абарону”, гаворыцца ў публікацыі.
Паводле слоў Вайкшнараса, падчас гэтых вучэнняў Літва і яе саюзнікі запланавалі “больш магчымасцяў, чым запланавана для вучэнняў “Захад” у Беларусі”.
“Гэта не значыць, што мы праводзім вучэнні толькі для таго, каб паўплываць. Вядома, галоўнае — па люстраным прынцыпе ўзмацніць наш стрымальны эфект, засцерагчы сябе ад правакацый”, — заявіў кіраўнік Генштаба.
10 ліпеня ў Літву з Беларусі заляцеў расійскі дрон. Раніцай 28 ліпеня паліцыя папярэдзіла грамадзян аб уварванні з тэрыторыі Беларусі БПЛА неўстаноўленага тыпу.
16 ліпеня Міністэрства замежных спраў Літвы ўручыла часоваму паверанаму ў справах Беларусі ноту з рашучым пратэстам у сувязі з “незаконным парушэннем паветранай прасторы шматфункцыянальным беспілотным лятальным апаратам “Гербера” расійскай вытворчасці”.
Знешнепалітычнае ведамства адзначыла, што беспілотнік уляцеў у Літву 10 ліпеня з боку Беларусі і ўпаў “прыкладна за адзін кіламетр ад дзяржаўнай мяжы”.
МЗС “настойліва запатрабавала” ад Беларусі “ў самыя кароткія тэрміны даць тлумачэнні з нагоды гэтага інцыдэнту і прыняць усе неабходныя меры, каб падобныя выпадкі не паўтараліся ў будучыні”.
2–16 верасня пройдуць маштабныя беларуска-расійскія вучэнні “Захад-2025”. Паведамлялася, што на іх будуць адпрацаваныя прымяненне ядзернай зброі і комплексу “Арэшнік”, а таксама супрацьпаветраная абарона, абарончыя баявыя дзеянні, падтрымка тактычнай авіяцыі і інш.
Як паведамлялася, у сувязі з набліжэннем вучэнняў Літва закрыла паветраную прастору ўздоўж часткі мяжы з Беларуссю да 1 кастрычніка.
Паведамлялася, што Вільнюс плануе ўзмацніць ахову мяжы ў сувязі з набліжэннем пачатку вучэнняў.
Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.
