У апошні тыдзень лета рэзка скарацілася колькасць грамадзян еўрапейскіх краін, якія ўехалі ў Беларусь
1 верасня, Позірк. З 25 жніўня да 1 верасня ў Беларусь без віз уехаў 3.461 грамадзянін еўрапейскіх дзяржаў (тыднем раней — 5.748, у 1,66 раза больш), вынікае са звестак Дзяржаўнага пагранічнага камітэта.
За названы перыяд у Беларусь прыбыло 1.203 грамадзяніна і неграмадзяніна Латвіі (2.386), 935 грамадзян Літвы (1.457), 488 грамадзян Польшчы (600) і 835 грамадзян іншых еўрапейскіх дзяржаў са спісу пашыранага бязвізу (1.305).
Усяго з 15 красавіка 2022 года Беларусь наведала 1.195.276 жыхароў Еўропы. З Латвіі прыбыло 382.362, з Літвы — 645.012, з Польшчы — 121.213. У рамках пашыранага бязвізу з 19 ліпеня 2024 года ў Беларусь уехала 46 689 замежных грамадзян.
Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — Польшчы. 19 ліпеня 2024 года беларускія ўлады распаўсюдзілі бязвізавы рэжым на грамадзян яшчэ 35 краін Еўропы.
Гаворка пра жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі. Большасць гэтых краін рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.
Бязвіз для жыхароў 38 еўрапейскіх краін дзейнічае да канца 2025-га, аднак, хутчэй за ўсё, будзе падоўжаны, як гэта ўжо адбывалася.
Грамадзяне гэтых дзяржаў могуць уязджаць у Беларусь без візы праз усе наземныя і паветраныя міжнародныя пункты пропуску “на падставе сапраўдных дакументаў”, знаходзіцца на беларускай тэрыторыі “не больш за 30 сутак з дня ўезду”.
