Мінабароны Беларусі акрэдытавала ваеннага аташэ пры амбасадзе Фінляндыі

2 верасня, Позірк. У Беларусі акрэдытаваны ваенны аташэ Фінляндыі — капітан 2-га рангу Юсі Ямсен, вынікае з паведамлення, апублікаванага 2 верасня Міністэрствам абароны.

Адзначаецца, што Ямсен з’яўляецца аташэ пры амбасадзе ў Расіі і Беларусі па сумяшчальніцтве.

На акрэдытацыйнай сустрэчы ў дэпартаменце міжнароднага ваеннага супрацоўніцтва Мінабароны “бакі абмяняліся думкамі аб стане ваенна-палітычнага становішча ў рэгіёне і двухбаковых адносін у ваеннай сферы”, гаворыцца ў паведамленні.

Таксама ў сустрэчы прыняў удзел намеснік ваеннага аташэ пры амбасадзе Фінляндыі ў РФ капітан 3-га рангу Леа Вехмола. Аналагічную пасаду па сумяшчальніцтве ён заняў і пры дыпмісіі ў Беларусі.

Раней намеснікам ваеннага аташэ Фінляндыі ў Беларусі па сумяшчальніцтве быў капітан другога рангу Хейкі Маціла.

Дыпламатычныя адносіны паміж Беларуссю і Фінляндыяй устаноўленыя 26 лютага 1992 года. 1 кастрычніка 2010 года ў Мінску адкрылася аддзяленне фінскай амбасады ў Літве. Амбасада Беларусі ў Хельсінкі пачала працаваць 5 снежня 2011 года.