Мінабароны паведаміла пра гібель вайскоўца пры дэсантаванні з самалёта (дапоўнена)

4 верасня, Позірк. Пра гібель вайскоўца Узброеных сіл паведамляе Міністэрства абароны.

Загінулы навучаўся на 3-м курсе аднаго з факультэтаў Ваеннай акадэміі, меў неаднаразовы вопыт дэсантавання, адзначае ведамства.

Паводле папярэдняй інфармацыі, “праз няштатную сітуацыю ў паветры падчас дэсантавання з самалёта Ан-2 на адным з палігонаў вайсковец атрымаў траўму, несумяшчальную з жыццём”.

Мінабароны паведаміла пра пачатак праверкі па факце гібелі вайскоўца, абставіны высвятляюцца камісіяй ведамства сумесна са Следчым камітэтам.

Заяўляецца, што на месца здарэння “выехаў асабіста намеснік міністра абароны”.

“Ход правядзення праверкі — на асабістым кантролі міністра абароны”, — гаворыцца ў паведамленні.

Мінабароны не паведаміла, дзе канкрэтна адбылося надзвычайнае здарэнне.