Беларускі турыст, які знік у гарах Кабардзіна-Балкарыі, знойдзены мёртвым
Аблёт мясцовасці на верталёце напярэдадні
7 верасня, Позірк. Зніклы ў гарах Эльбрускага раёна Кабардзіна-Балкарыі беларускі турыст раніцай 7 верасня знойдзены мёртвым, паведаміла МНС гэтага расійскага рэгіёна.
Труп знаходзіўся ў раёне вадаспаду Церскол на вышыні 2.800 метраў. Цела эвакуіравана і перададзена следча-аператыўнай групе. У пошуках удзельнічала 19 супрацоўнікаў Эльбрускага высакагорнага пошукава-ратавальнага атрада МНС і цэнтра “Лідар” гэтага ведамства.
Турыст, які не зарэгістраваўся перад уздымам, перастаў выходзіць на сувязь 3 верасня.
Паводле інфармацыі МНС, 26-гадовы мужчына планаваў падняцца на гару Церскалак (3.800 м). З заявай пра страту сувязі з ім у МНС звярнуліся сваякі.
