10 верасня, Позірк. Парушэнне расійскімі беспілотнікамі паветранай прасторы Польшчы — гэта “не выпадковасць, а наўмысная эскалацыя”, заявіла ў сацсетцы Х 10 верасня дэмакратычны лідар Святлана Ціханоўская.
Паводле яе слоў, прэзідэнт Расіі Уладзімір Пуцін і Аляксандр Лукашэнка “ставяць пад пагрозу Польшчу і ўвесь Еўрасаюз”.
“Гэта “адказ” Расіі на мірныя намаганні: больш тэрору, больш правакацый”, — адзначыла Ціханоўская.
“Еўропа павінна адказаць адзінствам і сілай, каб спыніць гэтую агрэсію”, — падкрэсліла яна.
Як заявіў у Х намеснік кіраўніцы Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка, “беспрэцэдэнтнае парушэнне паветранай прасторы Польшчы расійскімі беспілотнікамі” з’яўляецца дэманстрацыяй таго, што “Расія і яе саюзнік, рэжым Лукашэнкі, выпрабоўваюць сістэму СПА НАТО агулам, і Польшчы, у прыватнасці, напярэдадні вучэнняў “Захад-2025”.
“Пакуль гэтыя рэжымы застаюцца ва ўладзе, пагрозы еўрапейскай бяспецы будуць пастаяннымі”, — падкрэсліў Латушка.
Раніцай 10 верасня польскія ўлады паведамілі аб масавым уварванні расійскіх дронаў на тэрыторыю краіны — першым за тры з паловай гады поўнамаштабнай агрэсіі РФ супраць Украіны. Паводле інфармацыі ўкраінскіх маніторынгавых каналаў, частка расійскіх дронаў прыляцела ў Польшчу праз Брэсцкую вобласць. Варшава заявіла пра “акт агрэсіі”. Паведамляецца аб адным пашкоджаным жылым будынку. Для нейтралізацыі БПЛА задзейнічаліся сілы як Польшчы, так і іншых краін НАТО.
Прэзідэнт Украіны Уладзімір Зяленскі назваў прылёт расійскіх дронаў у Польшчу “вельмі небяспечным прэцэдэнтам для Еўропы”.
Начальнік Генеральнага штаба — першы намеснік міністра абароны Беларусі Павел Муравейка заявіў, што “па наяўных каналах узаемадзеяння ў перыяд з 23:00 гадзін 9 верасня да 4:00 10 верасня дзяжурныя сілы і сродкі [Беларусі] абменьваліся інфармацыяй аб паветранай і радыёлакацыйнай абстаноўцы з дзяжурнымі сіламі і сродкамі Польшчы і Літоўскай Рэспублікі”. “Тым самым апавясціўшы іх пра набліжэнне невядомых лятальных апаратаў да тэрыторыі іх краін”, — дадаў прадстаўнік ваеннага ведамства.
Паводле яго сцвярджэння, гэта дазволіла польскаму боку аператыўна адрэагаваць на дзеянні беспілотнікаў, падняўшы ў паветра свае дзяжурныя сілы.
