Беларусь і Венесуэла разглядаюць магчымасці наладзіць прамыя авіязносіны — МЗС

18 верасня, Позірк. “Стан супрацы” ў галіне “забеспячэння авіяцыйных зносін” абмеркавалі 17 верасня амбасадар Беларусі ў Венесуэле Дзмітрый Дзеравінскі і міністр транспарту гэтай дзяржавы ў Паўднёвай Амерыцы Рамон Селясціна Веласкес Арагуаян, паведамляе прэс-служба беларускага знешнепалітычнага ведамства.

Паводле інфармацыі МЗС, суразмоўцы “разгледзелі магчымасці наладжвання прамых авіярэйсаў паміж Мінскам і Каракасам з арганізацыяй перавозак як пасажыраў, так і грузаў”. Яны таксама ўзгаднілі “правядзенне ў бліжэйшай перспектыве шэрага сумесных мерапрыемстваў для ўмацавання двухбаковага ўзаемадзеяння ў гэтай сферы”.

Пра тое, што магчымасць арганізацыі прамога рэйса паміж Каракасам і Мінскам пры ўдзеле венесуэльскай авіякампаніі Conviasa “вельмі сур’ёзна прапрацоўваецца”, 16 кастрычніка 2023 года заяўляў журналістам Сяргей Алейнік, які займаў тады пасаду кіраўніка МЗС, па выніках сустрэчы ў Мінску з венесуэльскім калегам Іванам Хілем Пінта.

27 жніўня 2025 года кіраўнік Венесуэлы Нікалас Мадура, прымаючы ад Дзеравінскага даверчыя граматы, заявіў пра гатоўнасць развіваць стасункі з Беларуссю ў “шырокім спектры кірункаў”.

Паводле сцвярджэння беларускага МЗС, палітык назваў ролю Аляксандра Лукашэнкі “значнай” ва ўмацаванні міждзяржаўнага дыялогу, а пазіцыю афіцыйнага Мінска “паслядоўнай” і “скіраванай на забеспячэнне стабільнасці і развіцця краіны”.

Мадура падзякаваў Мінску за падтрымку ў кантэксце “актуальнага рэгіянальнага парадку дня” і пацвердзіў “намер наведаць з візітам” Беларусь.

Рэжым Лукашэнкі з’яўляецца саюзнікам венесуэльскага.