Прэзідэнт Украіны і кіраўнік МЗС Літвы выступілі за ўзмацненне санкцый у дачыненні да Беларусі
Уладзімір Зяленскі і Кястуціс Будрыс
19 верасня, Позірк. “Украіна і Літва маюць аднолькавае бачанне: санкцыі павінны дзейнічаць і супраць Расіі, і супраць Беларусі, пакуль ідзе агрэсія”, — паведаміла прэс-служба прэзідэнта Украіны Уладзіміра Зяленскага па выніках яго сустрэчы з міністрам замежных спраў Літвы Кястуцісам Будрысам у Кіеве 19 верасня.
Адзначаецца, што бакі “надалі ўвагу неабходнасці ўзмацнення санкцыйнай палітыкі”.
Акрамя таго, суразмоўцы “падрабязна абмеркавалі бяспеку рэгіёна, патэнцыйныя агульныя пагрозы з боку Расіі і Беларусі, у прыватнасці, у кантэксце нядаўняй атакі расійскіх дронаў на Польшчу”. Пры гэтым Зяленскі адзначыў, што Украіна “гатовая дзяліцца з партнёрамі досведам барацьбы з расійскімі ракетамі і дронамі”.
Пра неабходнасць узмацнення санкцый супраць афіцыйнага Мінска Будрыс заявіў у інтэрв’ю літоўскаму агенцтву ELTA 18 верасня і падчас свайго выступу (па відэасувязі) 19 верасня на сесіі Савета ААН па правах чалавека ў Жэневе, дзе абмяркоўваўся даклад Групы незалежных экспертаў па Беларусі.
МЗС Украіны 15 верасня апублікавала заяву, у якой назвала сустрэчу Аляксандра Лукашэнкі ў Мінску з кіраўніком акупаванай Расіяй часткі Херсонскай вобласці Уладзімірам Сальда “чарговым праяўленнем грубай пагарды да суверэнітэту і тэрытарыяльнай цэласнасці Украіны, усяго ўкраінскага народа”.
“Ганебным з’яўляецца не толькі факт сустрэчы, але і выказванні Аляксандра Лукашэнкі пра акупаваную частку Херсонскай вобласці як нібыта “новы рэгіён” Расіі, гатоўнасць садзейнічаць умацаванню акупацыйнага рэжыму і развіваць гандаль з акупантамі”, — адзначалася ў заяве.
Украіна “пакідае за сабой права адэкватнага рэагавання з мэтай узмацнення санкцыйных рэжымаў і паглыблення міжнароднай ізаляцыі беларускага рэжыму за супрацьпраўныя дзеянні насуперак шматлікім рэзалюцыям Генеральнай асамблеі ААН”, — падкрэсліла ведамства.
Дзеянні Расіі і згода Беларусі на выкарыстанне яе паветранай прасторы ў ваенных мэтах уяўляюць прамую пагрозу бяспецы для ўсіх краін рэгіёна, гаварылася ў апублікаванай 11 верасня сумеснай заяве міністраў замежных спраў Літвы Кястуціса Будрыса, Польшчы Радаслава Сікорскага і Украіны Андрэя Сібігі.
Афіцыйны Мінск падтрымлівае Маскву ў развязанай ёй ў лютым 2022 года поўнамаштабнай вайне супраць Украіны.
