Затрыманы прадпрымальнік, які арганізоўваў нелегальныя паляўнічыя туры

30 верасня, Позірк. У дачыненні да 43-гадовага прадпрымальніка, які аказваў нелегальныя паслугі турыстычнага аператара, узбуджана чатыры крымінальныя справы, паведамляе прэс-служба Міністэрства ўнутраных спраў.

Паводле інфармацыі ведамства, з 2023 па 2025 гады мужчына “выступаў як пасярэднік паміж замежнымі грамадзянамі і паляўнічымі ўгоддзямі Мінскай і Магілёўскай абласцей, незаконна арганізоўваў паляўнічыя туры”.

Пры гэтым ён, як сцвярджаецца, “парушаў патрабаванні да часовага ўвозу-вывазу спецыяльнай зброі і боепрыпасаў”. Фігурант справы, паводле даных МУС, таксама “неправамерна даваў у карыстанне” кліентам сваю асабістую наразную зброю і боепрыпасы.

Мужчыну затрымалі. Канфіскаваныя знойдзеныя ў яго дома тры адзінкі агнястрэльнай паляўнічай зброі, больш за 150 боепрыпасаў.

МУС нагадвае, што замежныя грамадзяне могуць займацца паляваннем, увозіць у Беларусь і вывозіць з яе агнястрэльную зброю і боепрыпасы “строга ў адпаведнасці з нацыянальным заканадаўствам”.