З 2020 года ліквідавана не менш за 1.970 НКА — Lawtrend

2 кастрычніка, Позірк. За пяць гадоў — пасля прэзідэнцкіх выбараў 9 жніўня 2020 года і па 30 верасня 2025-га — у Беларусі ліквідавана не менш за 1.970 НКА — аб’яднанняў, прафсаюзаў, фондаў, недзяржаўных устаноў, асацыяцый, вынікае з новага агляду праваабарончай арганізацыі Lawtrend.

На канец жніўня было ліквідавана не менш 1.950 НКА, ліпеня — 1.948, чэрвеня — 1.944, траўня — 1.936, красавіка — 1.926, сакавіка — 1.917, лютага — 1.905, студзеня — 1.896, на канец 2024 года — 1.891, усяго за мінулы год — мінімум 382.

Паводле інфармацыі Lawtrend, на канец верасня 2025 года ў працэсе прымусовай ліквідацыі знаходзілася не менш за 1.211 некамерцыйных арганізацый. На канец жніўня такіх было 1.193, ліпеня — 1.192, чэрвеня — столькі ж, траўня — 1.190, красавіка — 1.189, сакавіка і лютага — 1.188, студзеня — 1.187, снежня 2024-га — 1.186.

Рашэнне аб самастойнай ліквідацыі прыняло па меншай меры 759 НКА (у верасні 2). На канец жніўня такіх было 757, ліпеня — 756, чэрвеня — 752, траўня — 746, красавіка — 737, сакавіка — 729, лютага — 717, студзеня — 709, на канец 2024 года — 705.

У справаздачы за верасень адзначаецца, што больш за сто прадстаўнікоў арганізацый грамадзянскай супольнасці (АГС) працягваюць утрымлівацца ў месцах пазбаўлення волі. Інфармацыйныя рэсурсы арганізацый грамадзянскай супольнасці прызнаюцца “экстрэмісцкімі матэрыяламі”. Расце колькасць “экстрэмісцкіх фарміраванняў”. Распаўсюджаная практыка прызнання “экстрэмісцкімі фарміраваннямі” арганізацый і ініцыятыў пасля прызнання іх інфармацыйных рэсурсаў “экстрэмісцкімі”. Звяртаецца ўвага, што прадстаўнікі АГС рэгулярна ўносяцца ў “пералікі асоб датычных да экстрэмісцкай і/або тэрарыстычнай дзейнасці”.

“Падатковая інспекцыя правяла праверкі ў некалькіх недзяржаўных устаноў, якія знаходзяцца ў працэсе ліквідацыі ўжо больш за чатыры гады ў выніку вынясення такога рашэння ўладамі. Пры гэтым адсутнічае аднастайная практыка ліквідацыі. Многія з прымусова ліквідаваных некамерцыйных арганізацый былі выключаныя з АДР без завяршэння працэсу ліквідацыі, праходжання падатковых і іншых праверак, яны ў тым ліку маюць маёмасць, праекты, зарэгістраваныя ў дэпартаменце па гуманітарнай дзейнасці, даўгі перад крэдыторамі і г.д. У большасці з суб’ектаў, правяраемых ў дадзены перыяд, адсутнічае доступ да бухгалтарскай і іншай дакументацыі з прычыны яе канфіскацыі ў выніку ператрусаў. У сувязі з немагчымасцю прадстаўлення дакументацыі НКА, якія правяраюцца, і іх былым кіраўнікам налічаныя падаткі і штрафныя санкцыі”, — адзначае Lawtrend.