Улады разлічваюць нарасціць экспарт у Афрыку да 1 млрд долараў

3 кастрычніка, Позірк. Улады разлічваюць нарасціць экспарт у Афрыку да 1 млрд долараў да 2030 года, вынікае са слоў першага намесніка міністра замежных спраў Сяргея Лукашэвіча 30 верасня на семінары аб “актуальных пытаннях беларуска-афрыканскага супрацоўніцтва” ў Палаце прадстаўнікоў.

У 2024 годзе беларускі экспарт на кантынент дасягнуў 650 млн долараў, за студзень — ліпень бягучага года пастаўкі перавысілі 500 млн долараў, паведамляе са спасылкай на прадстаўніка МЗС сайт “Эканамічнай газеты”.

Член пастаяннай камісіі па міжнародных справах ПП НС, прапагандыст Аляксандр Шпакоўскі заявіў, у прыватнасці, што “пасля развіцця палітычных кантактаў Беларусь пачала займаць ключавую ролю ў працэсе механізацыі Зімбабвэ”: “Пастаўкі нашых прамысловых тавараў у [краіну] ўзраслі ў 131 раз”.

Шпакоўскі выказаўся за развіццё “айчыннай школы афрыканістыкі”, каб “прадметна весці справы ў палітыцы і эканоміцы”.

Улады інтэнсіфікуюць развіццё стасункаў з краінамі Афрыкі ў апошнія гады.

Як паведамлялася, напярэдадні Аляксандр Лукашэнка правёў тры закрытыя сустрэчы, адна з іх датычылася супрацоўніцтва з афрыканскімі краінамі.

“Пастаўкі беларускай прадукцыі на Афрыканскі кантынент, зборачная вытворчасць тэхнікі, супрацоўніцтва ў сферы сельскай гаспадаркі і забеспячэнне харчовай бяспекі — усё гэта запатрабаваныя кірункі, па якіх ёсць запыт у афрыканскіх партнёраў”, — гаворыцца ў рэлізе і сцвярджаецца, што Лукашэнка “патрабуе інтэнсіфікаваць працу і паскарацца”.