У Вільнюсе можа з’явіцца супольны офіс дэмакратычных партый Беларусі

6 кастрычніка, Позірк. Перспектыву адкрыцця ў Вільнюсе “міжпартыйнага офіса дэмакратычных партый Беларусі” абмеркавалі экс-кіраўнік Аб’яднанай грамадзянскай партыі, а цяпер дарадца Святланы Ціханоўскай па парламенцкай супрацы і канстытуцыйнай рэформе Анатоль Лябедзька, лідар дэ-юрэ ліквідаванай Беларускай партыі “Зялёныя” (БПЗ) Дзмітрый Кучук і дэпутат Сейма Літвы Томас Тамілінас, паведамляе “Парламенцкі канал”.

Бакі сярод іншага заявілі пра актуальнасць вяртання БПЗ “статусу назіральніка ў Форуме еўрапейскіх зялёных” (беларускія “зялёныя” былі пазбаўленыя статусу асацыяванага члена Еўрапейскай партыі зялёных).

На сустрэчы таксама была адзначана важнасць таго, каб у літоўскім парламенце прайшло галасаванне па запуску дзейнасці цэнтра Савета Еўропы па Беларусі ў Вільнюсе, каб на “саміце Форума еўрапейскіх зялёных” было праведзенае мерапрыемства па Беларусі, а таксама была падтрыманая ініцыятыва па правядзенні форума сімвалічных “хросных” беларускіх палітвязняў.

Паводле інфармацыі “Парламенцкага канала”, на сустрэчы было пацверджана, што ў Сейме Літвы запланаваная выстава Уладзіміра Цэслера.

Сустрэча адбылася “ў працяг прэс-канферэнцыі 16 верасня ў Сейме Літвы”, на якой, у прыватнасці, член парламенцкага камітэта па замежных справах і парламенцкай групы “За дэмакратычную Беларусь” Русланас Барановас заявіў, што беларускія палітвязні могуць уліць новую энергію ў барацьбу за Беларусь.

Дэпутат Тамілінас быў сімвалічным “хросным” Кучука, якога разам з паўсотняю беларускіх палітвязняў вызвалілі і вывезлі з краіны ў Літву 11 верасня 2025 года.

Улетку і ўвосень 2023 года ў Беларусі было скасавана 12 палітычных сіл — Кансерватыўна-хрысціянская партыя — БНФ, Беларуская патрыятычная партыя, Беларуская партыя “Зялёныя”, партыя “Беларуская сацыял-дэмакратычная Грамада”, Рэспубліканская партыя, Сацыял-дэмакратычная партыя народнай згоды, Партыя БНФ, Аб’яднаная грамадзянская партыя, Беларуская сацыяльна-спартыўная партыя, Беларуская сацыял-дэмакратычная партыя “Грамада”, Беларуская партыя левых “Справядлівы свет”, Беларуская аграрная партыя (самаліквідавалася).

У краіне засталося чатыры праўладныя партыі — “Белая Русь”, Ліберальна-дэмакратычная партыя, Камуністычная партыя Беларусі і Рэспубліканская партыя працы і справядлівасці.