Мінэканомікі разлічвае на рост ВУП у наступным годзе менш за 3%

10 кастрычніка, Позірк. Праект праграмы сацыяльна-эканамічнага развіцця да 2030 года прадугледжвае рост ВУП у наступным годзе на 2,8%, заявіў у апублікаваным 10 кастрычніка інтэрв’ю дзяржаўнай газеце “Рэспубліка” міністр эканомікі Юрый Чабатар.

Паводле чыноўніка, на 2026 год закладваецца рост аб’ёму інвестыцый на 3,1%, рэальных наяўных даходаў насельніцтва — на 4,8%.

“У прагнозе-2026 мы зыходзілі з трэндаў развіцця сусветнай эканомікі, нашых ключавых партнёраў: Расіі, Кітая, краін Афрыкі і Азіі. Зверылі гадзіннікі з калегамі з РФ, абмяркоўвалі праблемныя аспекты, узаемныя кропкі росту”, — сказаў міністр.

Вынікаў плануецца дасягаць за кошт выканання вытворчай, інвестыцыйнай і экспартнай праграм: “З дапамогай станоўчай дынамікі рэальнага сектара, а таксама рэалізацыі патэнцыялу паслуг <…> — турыстычных. Іх доля ў ВУП краіны павінна дасягнуць 2,6% <…> Яшчэ адзін ключавы кірунак — ІТ-сфера. Тут асноўныя задачы — імпартазамяшчэнне і пераход на беларускае праграмнае забеспячэнне”, — пералічыў міністр.

Сярод прыярытэтаў ён таксама назваў будаўніцтва інфраструктуры і жылля, у тым ліку арэнднага.

Гаворачы пра экспарт, Чабатар падкрэсліў, што ўлады “працягнуць працу па нарошчванні паставак у краіны СНД і далёкай дугі”. У той жа час, лічыць ён, “неабходна ўмацаваць <…> на расійскім рынку”.

Пэўная колькасць задач праграмы сацыяльна-эканамічнага развіцця на 2026–2030 гады мае “дастаткова дэкларатыўны характар”, заявіў 6 кастрычніка старшыня праўлення Нацыянальнага банка, былы прэм’ер-міністр Раман Галоўчанка.

На першым пасяджэнні спецыяльнай групы, сфармаванай распараджэннем Аляксандра Лукашэнкі 3 кастрычніка для дапрацоўкі праекта праграмы, кіраўнік Нацбанка падкрэсліў, што “шэраг галінавых задач мае форму працэсу, а не выніку”.

Раней урад вызначыў пяць прыярытэтаў у праекце праграмы сацыяльна-эканамічнага развіцця на 2026–2030 гады, вынікала са слоў Чабатара. Гэта арэнднае жыллё, якасныя дарогі, “развіццё праз лічбавізацыю і тэхналагічнасць рэальнага сектара эканомікі”, “моцныя рэгіёны” і турызм.

Паводле даных Белстата, ВУП павялічыўся за студзень — жнівень 2025 года на 1,6% да аналагічнага перыяду 2024-га і ў бягучых цэнах склаў 180,1 млрд рублёў.

Згодна з найважнейшымі эканамічнымі прагнознымі (дэ-факта — планавымі) параметрамі на гэты год, рост ВУП павінен скласці 4,1%.

Паводле вынікаў 2024 года рост эканомікі склаў 4%, 2023 — 3,9%, 2022 — ВУП знізіўся на 4,7%, 2021 — вырас на 2,3%, 2020 — скараціўся на 0,9%.