Транспартную кампанію, чый аўтамабіль трапіў у смяротнае ДТЗ у Светлагорскім раёне, чакае праверка

11 кастрычніка, Позірк. Транспартную кампанію, чый аўтамабіль трапіў у смяротнае дарожна-транспартнае здарэнне 10 кастрычніка ў Светлагорскім раёне (Гомельская вобласць), чакае пазапланавая праверка.

Паводле інфармацыі Следчага камітэта, праверка па пытаннях арганізацыі перавозак будзе прызначаная ў рамках расследавання крымінальнай справы, ужо вынятая неабходная дакументацыя. Раней паведамлялася, што справа заведзеная паводле ч. 3 арт. 317 КК (парушэнне правілаў дарожнага руху або эксплуатацыі транспартных сродкаў, якое прывяло з неасцярожнасці да смерці дзвюх або больш асоб).

Адзначаецца, што на 72-м кіламетры дарогі Р-31 (Бабруйск — Мазыр — мяжа Украіны) працягваюцца следчыя дзеянні “з мэтай высвятлення ўсіх абставін аварыі”.

Паводле інфармацыі ДАІ Гомельскай вобласці, напярэдадні ўвечары “кіроўца маршрутнага таксі “Мэрсэдэс” здзейсніў спадарожнае сутыкненне з трактарам, які рухаўся <…> з паўпрычэпам, пасля чаго не даў рады кіраванню і выехаў на паласу сустрэчнага руху, дзе здзейсніў сутыкненне з аўтамабілем “Фальксваген”.

Міністэрства аховы здароўя паведаміла, што ў выніку аварыі пацярпела 19 чалавек: загінула — 6, шпіталізавана — 8 (у тым ліку падлетак), адмовілася ад шпіталізацыі пасля агляду ўрачамі — 2, пакінула месца аварыі да прыбыцця медыкаў — 3.

У васьмі шпіталізаваных дыягнаставаныя адкрытыя пераломы, вывіхі, траўмы, у тым ліку чэрапна-мазгавыя.