Ціханоўская ў Дзень маці падзякавала “кожнай, хто ахвяраваў свабодай дзеля жыцця дзяцей у свабоднай краіне”

14 кастрычніка, Позірк. Кожнай жанчыне, “хто ахвяраваў свабодай дзеля таго, каб яе дзеці жылі ў свабоднай краіне”, падзякавала дэмакратычны лідар Святлана Ціханоўская 14 кастрычніка ў віншаванні з Днём маці.

У сваім тэлеграм-канале палітык звярнулася да маці, якія “гадуюць дзяцей у гэтыя цяжкія часы, вучаць іх адрозніваць дабро ад зла, верыць у сябе і не баяцца быць сумленнымі”, хто “любіць і чакае сваіх сыноў і дачок з турмы або з выгнання, не перастаючы спадзявацца на хуткую сустрэчу”. “Вы — наш гонар, наша пяшчота, наша апора. Вы нагадваеце, што Беларусь — гэта людзі, здольныя любіць, дараваць і ствараць жыццё нават там, дзе здаецца, што ўсё разбурана”, — падкрэсліла Ціханоўская.

Яна выказала шкадаванне ў сувязі з тым, што “сёння не ўсе могуць асабіста павіншаваць сваіх маці”. “Рэжым зрабіў усё магчымае, каб стварыць перашкоды, адарваць нас ад родных, пазбавіць гэтай важнай сувязі”, — канстатавала дэмлідэр. “Але ні адлегласць, ні сцены турмаў, ні выгнанне не могуць разбурыць тое, што маці адчувае сэрцам”, — адзначыла палітык.

Ціханоўская зычыла “кожнай маме ў Беларусі і за яе межамі як мага хутчэй абняць сваіх дзяцей”, каб у кожным доме “зноў гучаў смех, а Беларусь адчула сябе адной вялікай сям’ёй, у якой пануе каханне”.

Паводле звестак праваабарончага цэнтра “Вясна”, у Беларусі на 6 кастрычніка 188 жанчын былі надзеленыя статусам палітвязняў.

Дзень маці адзначаецца ў Беларусі 14 кастрычніка, у гэты ж дзень праваслаўная царква святкуе Пакроў Прасвятой Багародзіцы.