Літва стварыла ў сваёй паветранай прасторы 26 зон абмежавання палётаў

17 кастрычніка, Позірк. 26 зон абмежавання палётаў у паветранай прасторы Літвы створана для ўзмацнення кантролю неба, паведаміў міністр транспарту і камунікацый гэтай балтыйскай краіны Юрас Тамінскас.

Як паведамляе партал Delfi, частка зон размешчана над тэрытарыяльнымі водамі Літвы.

Пры гэтым адзначаецца, што абмежаванне палётаў у гэтых месцах будзе ўводзіцца пры неабходнасці “тэрміновага прымянення ваеннай сілы” супраць беспілотнікаў, якія парушылі паветраную прастору Літвы.

Удакладняецца, што ў такіх выпадках паводле патрабавання галоўнакамандуючага Узброенымі сіламі або ўпаўнаважанай ім асобы будзе “актываваная адпаведная зона абмежавання ў сетцы, пілоты паветраных суднаў, якія знаходзяцца ў гэтай зоне, будуць апавешчаныя не пазней чым за 10 хвілін да яе актывацыі, каб яны маглі яе пакінуць”.

Новы парадак уводзіцца ў Літве пасля таго, як Сейм прыняў папраўкі да закона, ініцыяваныя Міністэрствам транспарту і камунікацый. Ранейшы парадак дапускаў прымяненне ваеннай сілы толькі ў выключных выпадках — калі лятаючы аб’ект уваходзіў у забароненую зону і ствараў рэальную пагрозу важным дзяржаўным аб’ектам.

Міністэрства абароны Літвы 2 кастрычніка падоўжыла закрыццё паветранай прасторы краіны на мяжы з Беларуссю да 1 снежня. Першапачаткова Літва закрыла паветраную прастору ўздоўж часткі мяжы з Беларуссю ў жніўні — да 1 кастрычніка.

Гэта было зроблена “з улікам сітуацыі з бяспекай і пагроз грамадству, у тым ліку рызык для грамадзянскай авіяцыі, якія ўзнікаюць праз парушэнні паветранай прасторы беспілотнымі лятальнымі апаратамі, а таксама неабходнасць стварэння ўмоў для выканання літоўскімі вайскоўцамі задач, вызначаных законам у мірны час, у адказ на такія і падобныя парушэнні паветранай прасторы”.

10 ліпеня ў Літву з Беларусі заляцеў расійскі дрон.

Раніцай 28 ліпеня паліцыя папярэдзіла грамадзян пра ўварванне з тэрыторыі Беларусі БПЛА неўстаноўленага тыпу.

Нацыянальны цэнтр кіравання крызісамі Літвы ў каментары агенцтву BNS увечары 16 верасня заявіў, што беспілотнікі з выбухоўкай, якія ўварваліся ў Літву ў ліпені (10-га і 28-га), “выпадкова ўвайшлі ў паветраную прастору краіны і былі запушчаныя Расіяй з тэрыторыі Украіны”.

Разам з тым партал Delfi са спасылкай на свае крыніцы паведаміў, што расійскі дрон Gerbera, які 28 ліпеня пралятаў над Вільнюсам з двума кілаграмамі выбухоўкі, бартавым камп’ютарам і як мінімум адной сім-картай, быў запушчаны з вайсковай базы пад Оршай.