Украіна дамагаецца адхілення ад спаборніцтваў шэрагу беларускіх атлетаў з нейтральным статусам

20 кастрычніка, Позірк. Двое беларускіх атлетаў, якія займаюцца “прапагандысцкай дзейнасцю”, але ўсё адно працягваюць удзельнічаць у міжнародных спаборніцтвах у нейтральным статусе, унесеныя ў спіс асоб, якія, на думку ўладаў Украіны, павінны трапіць пад санкцыі.

Пералік спартсменаў, якія наўпрост ці ўскосна падтрымліваюць расійскую агрэсію, фармуюць Галоўнае ўпраўленне выведкі Міністэрства абароны (дакумент апублікаваны на звязаным з ім партале War&Sanctions) і Міністэрства моладзі і спорту Украіны. Цяпер у ім 177 прозвішчаў, у тым ліку 175 расійскіх і 2 беларускія — мастацкая гімнастка Аліна Гарнасько і батутыст Іван Літвіновіч.

На сайце адзначаецца, што абодва беларускія спартсмены маюць нейтральны статус, аднак у Беларусі бяруць удзел у прапагандысцкіх мерапрыемствах пад эгідай Аляксандра Лукашэнкі, які падтрымлівае вайну. Адначасова з гэтым атлеты маюць права браць удзел у міжнародных спаборніцтвах.

Напрыклад, Гарнасько ў 2025 годзе выступала ў Балгарыі, Германіі, Партугаліі, а Літвіновіч у 2024-м удзельнічаў у спаборніцтвах у Германіі.

19 сакавіка 2024 года Міністэрства моладзі і спорту Украіны заклікала адхіліць ад Алімпіяды і іншых міжнародных спаборніцтваў спартсменаў з грамадзянствам Беларусі і РФ, якія “шчыра не асудзілі” расійскую агрэсію. Такіх атлетаў украінскі бок разглядае як “агентаў гібрыднага ўплыву, якіх выкарыстоўвае расійскі і беларускі рэжымы для распаўсюду сваёй прапаганды”.

28 лютага 2022 года, праз некалькі дзён пасля пачатку вайны ва Украіне, МАК заклікаў спартыўныя федэрацыі не дапускаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынята да выканання, у выніку чаго расійскі і беларускі спорт апынуўся амаль у поўнай ізаляцыі.

25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ праз вайну супраць Украіны, аднак адзначыў, што ніводнаму спартсмену нельга забараняць удзельнічаць у спаборніцтвах “толькі праз яго пашпарт”.

28 сакавіка таго ж года МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах. Пры гэтым павінен быць выкананы шэраг умоў. Беларускія і расійскія атлеты могуць спаборнічаць “у якасці індывідуальных нейтральных спартсменаў” (без выкарыстання сцяга, гімна і іншай сімволікі сваіх дзяржаў) і толькі ў тым выпадку, калі яны “актыўна не займаліся падтрымкай баявых дзеянняў” і не маюць дзейных кантрактаў з сілавымі і вайсковымі ведамствамі сваіх краін.

8 снежня 2023 года МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях 2024 года (праходзілі з 26 ліпеня па 11 жніўня 2024 года) у Парыжы ў нейтральным статусе. Праз набліжэнне летняй Алімпіяды шэраг адпаведных федэрацый дапусціў беларусаў і расіян да спаборніцтваў пад сваёй эгідай.