Лукашэнка паабяцаў “усялякую дапамогу” народу Лівіі

21 кастрычніка, Позірк. Беларусь гатовая да “любых прапаноў” з лівійскага боку і здольная “аказаць усялякую дапамогу і падтрымку лівійскаму народу”, заявіў Аляксандр Лукашэнка 21 кастрычніка ў Мінску на сустрэчы з намеснікам галоўнакамандуючага Лівійскай нацыянальнай арміяй Садамам Хафтарам (сын вярхоўнага галоўнакамандуючага ЛНА Халіфы Хафтара).

Кажучы пра свой візіт у Лівію 25 гадоў таму, палітык, як перадае яго прэс-служба, падкрэсліў, што тады бакі “шмат пра што дамовіліся, нямала зрабілі”. Аднак стасункі былі зруйнаваныя — праз “пэўныя прычыны”.

Гаспадар сустрэчы запэўніў госця, што “ўсе дамоўленасці”, якія ўжо былі і яшчэ будуць дасягнутыя, беларускі бок “абавязкова выканае”.

“Я ведаю, што вы нацэленыя на тое, каб прынесці лівійскаму народу мір і спакой і аб’яднаць у адзіную цэлую лівійскую дзяржаву. Мы ў гэтым плане гатовыя з вамі працаваць дзень і ноч”, — заявіў Лукашэнка.

У сярэдзіне лютага 2025 года Халіфа Хафтар і яго сын Садам наведвалі Беларусь, каб абмеркаваць супрацу ў вайсковай сферы. Лукашэнка на сустрэчы з вярхоўным галоўнакамандуючым ЛНА заявіў, што гатовы да сумеснай працы.

У сакавіку Бенгазі наведала дэлегацыя Беларусі на чале з віцэ-прэм’ерам Віктарам Каранкевічам. Візіцёры прэзентавалі “магчымасці беларускай нафтаперапрацоўкі”, абмеркавалі супрацоўніцтва ў галіне геолагаразведкі ды інш.

Яшчэ адзін візіт урадавай дэлегацыі — ізноў з Каранкевічам — адбыўся ў траўні. Тады гаворка ішла пра развіццё супрацы ў гуманітарнай, сацыяльнай, эканамічнай сферах (у тым ліку пра пастаўкі прадуктаў харчавання, тэхнікі, сумесныя праекты ў адукацыі і медыцыне), а таксама пра ўзаемадзеянне ў прамысловасці, сельскай гаспадарцы ды інш.

Лукашэнка наведваў Лівію ў 2000 годзе. У рамках візіту ён правёў перамовы з Муамарам Кадафі, які тады быў фактычным лідарам краіны. У 2008 годзе Кадафі пабываў у Беларусі.

Дэ-юрэ Лівія — адзіная дзяржава, але дэ-факта пасля звяржэння і забойства ў 2011 годзе Кадафі (кіраваў 42 гады) краіна апынулася падзеленай і цяпер кіруецца некалькімі цэнтрамі ўлады.

ААН і міжнародная супольнасць прызнае ўрад нацыянальнага адзінства (УНА) на чале з прэм’ер-міністрам Абдэлем Хамідам Дбэйбам, які кантралюе каля траціны Лівіі — сталіцу Трыпалі і прылеглыя тэрыторыі (заходняя частка дзяржавы).

Каля дзвюх трацін краіны знаходзіцца пад кантролем усходняга ўрада Усамы Хамада, які базуецца ў Бенгазі, Палаты прадстаўнікоў у Табруку, якая яго прызначыла, і ЛНА на чале з Хафтарам, што іх падтрымлівае. Акрамя Беларусі цэнтр улады ва ўсходняй частцы Лівіі падтрымлівае Расія, Егіпет, ААЭ ды інш.

Нягледзячы на ​​тое, што УНА мае большую вагу на міжнароднай арэне, ва ўсходняга ўрада больш уплыву ўнутры краіны, у тым ліку дзякуючы кантролю над рэсурсамі і войскам.