Амбасадар Андрэеў уручыў даверчыя граматы прэзідэнту Бразіліі Луле да Сілве

21 кастрычніка, Позірк. Амбасадар Беларусі ў Бразіліі Андрэй Андрэеў уручыў даверчыя граматы прэзідэнту гэтай лацінаамерыканскай дзяржавы Луісу Інасіу Луле да Сілве, паведамляе прэс-служба знешнепалітычнага ведамства.

Падчас цырымоніі Андрэеў “падкрэсліў сяброўскі характар двухбаковых адносін, выказаў зацікаўленасць у далейшым развіцці міждзяржаўнага дыялогу і пашырэнні гандлёва-эканамічнага супрацоўніцтва”, а таксама “запэўніў у гатоўнасці да далейшай сумеснай працы па выбудоўванні справядлівага шматпалярнага свету”, адзначаецца ў паведамленні.

У жніўні Андрэеў даў інтэрв’ю тэлеканалу “Беларусь 1”, з якога вынікала, што тавараабарот паміж Беларуссю і Бразіліяй знізіўся прыблізна да ўзроўню сямігадовай даўніны.

“Бягучыя аб’ёмы [ўзаемнага гандлю] — каля 600–700 млн долараў тавараабароту — вядома, не адпавядаюць узроўню нашых палітычных і эканамічных адносін. Натуральна, мы можам зрабіць значна больш”, — сказаў ён.

Назваўшы Бразілію “шмат у чым сельскагаспадарчай краінай”, дыпламат згадаў пастаўкі беларускага хлоркалію, магчымы ўдзел у праграме механізацыі малых фермерскіх гаспадарак праз экспарт прадукцыі Мінскага трактарнага завода.

Таксама, паводле яго слоў, перспектыўным можа быць супрацоўніцтва ў медыцыне.

У кантэксце заходніх санкцый і іх уплыву, амбасадар адзначыў, што краіны “ўжо знаходзяць узаемавыгадныя шляхі ў лагістыцы”, і пытанні ў гэтай сферы “цяпер не з’яўляюцца перашкодай для ўзаемных паставак”, як было раней.

Актуальныя звесткі пра ўзаемны гандаль паміж Бразіліа і Мінскам у адкрытым доступе адсутнічаюць.

Паводле інфармацыі на сайце амбасады Беларусі, у 2021 годзе ўзаемны тавараабарот склаў 782,9 млн долараў і павялічыўся да 2020-га на 8,9% (экспарт — 585,1 млн; +8,3%; імпарт — 197,8 млн; +11,2%).

Пры гэтым лічбы, блізкія да агучаных Андрэевым, фіксаваліся ў 2018 годзе, калі ўзаемны гандаль таварамі склаў 711,2 млн долараў. Годам раней ён быў на ўзроўні 512,7 млн (+39%).

Рэкордным у перыядзе, які разглядаецца, стаў 2019 год, калі тавараабарот дасягнуў 892,9 млн долараў.

Паводле даных МЗС Беларусі, доля калію ў складзе беларускага экспарту ў Бразілію ў 2021 годзе склала 96,1%; сукупная доля калійных, азотных і мінеральных угнаенняў — 97,2%.

“На думку амбасады, доля ўгнаенняў у беларускім экспарце ў 2022 годзе магла б перавысіць 99%, аднак увядзенне сектаральных санкцый ЕС і ЗША супраць асноўных беларускіх гульцоў у сферы вытворчасці і рэалізацыі калійных і азотных угнаенняў істотна ўскладняюць іх пастаўкі ў Бразілію”, — гаворыцца на сайце дыпмісіі.

Андрэеў, які пяць гадоў працаваў генеральным консулам у кітайскім Шанхаі, прызначаны амбасадарам у Бразіліі ў сакавіку 2025 года. Яго папярэднік Сяргей Лукашэвіч з траўня мінулага года з’яўляецца першым намміністра замежных спраў.