Прэм’ер Літвы абмяркуе з Тускам пытанне закрыцця межаў з Беларуссю
29 кастрычніка, Позірк. Прэм’ер-міністр Літвы Інга Ругінене ўжо коратка абмяркоўвала закрыццё мяжы з Беларуссю са сваім польскім калегам Дональдам Тускам, але неўзабаве пагаворыць з ім больш падрабязна. Такую заяву, паводле інфармацыі партала Delfi, літоўскі прэм’ер зрабіла 29 кастрычніка пасля пасяджэння ўрада, на якім было прынятае рашэнне аб фактычна поўным закрыцці мяжы да канца лістапада.
Ругінене таксама паведаміла, што 30 кастрычніка адправіцца ў Латвію, дзе абмяркуе пытанне закрыцця межаў з прэм’ер-міністрам Эвікай Сіліняй. Дыялог на гэтую тэму вядзецца таксама з урадам Эстоніі, сказала кіраўнік літоўскага ўрада.
“Мы працуем разам, і Латвія, і Эстонія, і Польшча падтрымліваюць нашы рашэнні, — падкрэсліла Ругінене. — <…>Вы таксама ўбачылі падтрымку на самым высокім узроўні Еўрапейскага саюза. Мы рады, што гэтая еўрапейская накіраванасць праяўляецца”.
29 кастрычніка ўрад Літвы прыняў рашэнне, што да канца восені будуць закрытыя ўсе пункты пропуску на мяжы з Беларуссю. Абмежаванні будуць дзейнічаць да 24:00 30 лістапада з магчымасцю падаўжэння.
Пункт пропуску Шальчынінкай (з беларускага боку Беняконі) застанецца закрытым цалкам. Для Мядзінінкая (Каменны Лог) захаваюцца выключэнні: праз яго будуць прапускацца дыпламаты, асобы, якія рухаюцца транзітам у Калінінградскую вобласць (РФ), людзі, якія вяртаюцца ў Літву — яе грамадзяне, грамадзяне краін Еўрасаюза і краін НАТО, а таксама члены іх сем’яў, і асобы, якія маюць від на жыхарства ў Літве. Таксама захоўваецца магчымасць выдачы гуманітарных пропускаў, рашэнне аб якіх будзе прымаць Служба аховы дзяржаўнай мяжы.
“Гэтае рашэнне можа быць прадоўжана настолькі, наколькі гэта неабходна. Я прашу ўсіх засяродзіцца і паставіцца з разуменнем. Я сапраўды разумею, што гэта створыць масу перашкод і нязручнасцяў як для нашых грамадзян, так і для нашага бізнесу, але сёння мы не можам не адрэагаваць на гібрыдную атаку, накіраваную на Літву”, — заявіла Ругінене.
28 кастрычніка прэм’ер-міністр Польшчы Дональд Туск паведаміў пра гатоўнасць адкрыць у пачатку лістапада два памежныя пераходы на мяжы з Беларуссю. Абвяшчаючы аб гэтым кроку, кіраўнік польскага ўрада адзначаў, што рашэнне аб адкрыцці пагранпераходаў неабходна ўзгадніць з літоўскім бокам, які закрыў сваю мяжу з Беларуссю з вечара 26 кастрычніка.
“Я даручыў розным міністэрствам падрыхтаваць гэтае рашэнне, каб яго можна было прыняць на гэтым тыдні. Але ў нас ёсць праблема на літоўска-беларускай мяжы. Праз неаднаразовыя правакацыі, як з выкарыстаннем паветраных шароў, так і іншых, з боку Беларусі і Расіі, літоўцы закрылі свае адзіныя памежныя пераходы з Беларуссю некалькі дзясяткаў гадзін таму. Таму я чакаю інтэнсіўных перамоваў з літоўцамі, каб не застаць іх знянацку. Мы павінны праводзіць паслядоўную палітыку ў дачыненні да нашых суседзяў”, — заявіў Туск.
8 жніўня 2023 года Літва закрыла на мяжы з Беларуссю пункты пропуску Шумскас (з сумежнага боку Лоша) і Твярачус (Відзы), 1 сакавіка 2024-га — Лаварышкес (Катлоўка) і Райгардас (Прывалка). Такім чынам, пасля сённяшняга рашэння ўрада ў абмежаваным рэжыме будзе працаваць толькі Мядзінінкай (Каменны Лог).
