Беларусь і КНДР маюць намер падтрымліваць адзін аднаго на міжнародных пляцоўках для “шматпалярнага светапарадку“
Помнік памерлым паўночнакарэйскім правадырам Кір Ір Сену і яго сыну Кім Чэн Іру ў Пхеньяне
30 кастрычніка, Позірк. Гатоўнасць да далейшай узаемнай падтрымкі на міжнародных пляцоўках “з мэтай фармавання справядлівага шматпалярнага светапарадку” пацверджана падчас сустрэчы кіраўнікоў знешнепалітычных ведамства Беларусі Максіма Рыжанкова і КНДР Чве Сон Хі.
Паводле інфармацыі прэс-службы МЗС Беларусі, бакі абмеркавалі пытанні развіцця “традыцыйна сяброўскіх адносін паміж дзвюма краінамі“, у аснове супрацоўніцтва якіх ляжаць “прынцыпы павагі суверэнітэту, раўнапраўя і ўзаемнай выгады“.
Міністры канстатавалі “актывізацыю дыялогу на розных узроўнях, абмеркавалі графік двухбаковых кантактаў”.
Дасягнута дамоўленасць аб пашырэнні ўзаемадзеяння па ўсіх напрамках, у тым ліку ў палітычнай, гандлёва-эканамічнай, гуманітарнай і іншых сферах і “аб канкрэтных кроках па ўмацаванні ўзаемадзеяння паміж знешнепалітычнымі ведамствамі дзвюх краін для вывядзення стасункаў на новы ўзровень“.
26 кастрычніка паўночнакарэйскае Цэнтральнае тэлеграфнае агенцтва (ЦТАК) анансавала візіт Чхве Сон Хі ў Беларусь і Расію на запрашэнне іх знешнепалітычных ведамстваў.
З прэзідэнтам РФ Уладзімірам Пуціным Чхве Сон Хі сустракалася 28 кастрычніка.
Сёлета ў траўні ў Пхеньяне адбылося 3-е пасяджэнне двухбаковай міжурадавай камісіі па гандлёва-эканамічным супрацоўніцтве паміж Беларуссю і КНДР.
Кіраўнік Паўночнай Карэі Кім Чэн Ын накіраваў віншавальную тэлеграму Лукашэнку 3 лютага — у дзень, калі Цэнтрвыбаркам афіцыйна абвясціў таго пераможцам у працэдуры, якую рэжым у Мінску лічыць“прэзідэнцкімі выбарамі”.
20 студзеня вядучае інфармагенцтва КНДР ЦТАК паведаміла, што малодшая сястра Кім Чэн Ына, намеснік дырэктара аддзела прапаганды і агітацыі Цэнтральнага камітэта кіроўнай у краіне Працоўнай партыі Карэі Кім Е Чжон зняпраўдзіла заяву Лукашэнкі, якая прагучала 17 студзеня, аб тым, што Пхеньян прапаноўваў Мінску арганізацыю сустрэчы на вышэйшым узроўні.
Абедзьве дзяржавы падтрымліваюць Крэмль у агрэсіі супраць Украіны. Беларускія ўлады дапамагаюць узбраеннем, Паўночная Карэя акрамя гэтага накіроўвае салдат.
