Лукашэнка абвінаваціў Польшчу ў зрыве дамоўленасцяў аб вызваленні Пачобута
31 кастрычніка, Позірк. У зрыве дамоўленасцяў аб адкрыцці пунктаў пропуску на беларуска-польскай мяжы і вызваленні журналіста-палітвязня Анджэя Пачобута абвінаваціў Варшаву Аляксандр Лукашэнка.
“У нас з палякамі былі кантакты. Яны просяць там гэтых Пачобутаў, шпіёнаў прызнаюць. Яны затрыманыя. “Аддайце”. Мы ім кажам: “Ну добра, там 2–3 чалавекі нашых ёсць. Вяртайце. Правядзём абмен”. Таксама сем’і і гэтак далей. Выведка была, ёсць і будзе. Я прызнаю гэта, паважаю. Добра, абмяняем. Пачобута хочаце — мы гатовыя пайсці і на гэта. “Ой, дзякуй вам і гэтак далей, мы гатовыя з вамі размаўляць, адкрываем пункты пропуску, яшчэ нешта”, — цытуе Лукашэнку яго прэс-служба.
Ён сцвярджае, што пазіцыя польскага боку потым змянілася: “Учора ўначы мне дакладвае КДБ: “Не, яны адступілі ад гэтай пазіцыі ў знак салідарнасці з Літвой за гэтыя вось шарыкі”. Я кажу: перадайце ім прывітанне. Адступілі — ну, і мы адступім. Мы на паўзу ставім. Калі саспееце — прыходзьце, будзем з вамі размаўляць”.
Лукашэнка падкрэсліў, што “адкрыты да дыялогу” і “размовы без нагнятання сітуацыі”, а таксама кампрамісу. Пры гэтым ён выказаў меркаванне, што яго крокі насустрач еўрапейскія і амерыканскія палітыкі прымаюць як слабасць.
“Я амерыканцам кажу: у мяне свае людзі ёсць, якія ацэньваюць мяне па канкрэтных кроках. Яны бачаць: “А, Лукашэнка там гэта адступіць, гэтага, гэтага вызваліў… А навошта, не трэба, хай бы сядзеў”. А яны ж не валодаюць той інфармацыяй, а я вочы ў вочы не магу ім усё гэта расказаць”, — дадаў ён.
Пра запланаванае адкрыццё пагранпераходаў на мяжы з Беларуссю заявіў 28 кастрычніка прэм’ер-міністр Польшчы Дональд Туск. Гаворка ішла пра пункт пропуску Баброўнікі (з беларускага боку — Бераставіца), які быў закрыты ў лютым 2023 года пасля асуджэння актывіста неафіцыйнага Саюза палякаў Беларусі Анджэя Пачобута, і пераход Кузніца (Брузгі), закрыты ў лістападзе 2021 года праз міграцыйны крызіс.
30 лістапада Польшча адклала адкрыццё двух пунктаў пропуску на мяжы з Беларуссю на некалькі тыдняў, пра гэта паведаміў міністр унутраных спраў і адміністрацыі Польшчы Марцін Кервіньскі.
“Мы зрабілі б гэта значна раней, калі б свае пераходы з Беларуссю не закрыла Літва. Літоўцы — нашы партнёры, мы з імі ў кантакце”, — сказаў Кервіньскі.
Усе пункты пропуску на беларуска-літоўскай мяжы будуць закрытыя цягам месяца — такое рашэнне прынята на пасяджэнні ўрада Літвы 29 кастрычніка. Абмежаванні будуць дзейнічаць да 24:00 30 лістапада з магчымасцю падаўжэння.
Пункт пропуску Шальчынінкай (з беларускага боку Беняконі) застанецца цалкам закрытым. Для Мядзінінкая (Каменны Лог) захаваюцца выключэнні.
8 лютага 2023 года Гродзенскі абласны суд Пачобута да 8 гадоў пазбаўлення волі ў калоніі ўзмоцненага рэжыму. Суддзя Дзмітрый Бубенчык прызнаў яго вінаватым паводле ч. 3 арт. 130 (распальванне расавай, нацыянальнай, рэлігійнай або іншай сацыяльнай варожасці ці варажнечы) і ч. 3 арт. 361 (заклікі да мер абмежавальнага характару (санкцый), накіраваных на прычыненне шкоды нацыянальнай бяспецы) Крымінальнага кодэкса.
