Жыхар Мінскага раёна загінуў у гаражы, пасля таго як надыхаўся парамі фарбы

4 лістапада, Позірк. Пра гібель 46-гадовага жыхара Мінскага раёна паведаміў Дзяржаўны камітэт судовых экспертыз (ДКСЭ).

Адзначаецца, што мужчына “займаўся фарбаваннем сцен у аглядавай яме свайго гаража”, “у пэўны момант яму стала дрэнна”.

“Праз некаторы час сусед знайшоў яго без прытомнасці, і неадкладна выклікаў хуткую дапамогу. Аднак прыбыўшыя медыкі канстатавалі смерць мужчыны”, — гаворыцца ў паведамленні.

У выніку было ўстаноўлена, што смерць мужчыны наступіла ад вострага атручэння талуолам, які з’яўляецца кампанэнтам фарбы і трапіў у арганізм праз дыхальныя шляхі (пры ўдыханні).

Паводле даных экспертаў, узровень талуолу ў крыві загінулага перавышаў смяротную дозу ў 18 разоў.

“Талуол уяўляе сабой сур’ёзную пагрозу як для здароўя чалавека, так і для навакольнага асяроддзя. Гэта таксічнае рэчыва патрабуе ўважлівага абыходжання і выкарыстання сродкаў індывідуальнай абароны. Судовыя эксперты нагадваюць, што нельга грэбаваць мерамі перасцярогі пры працы з аздобнымі матэрыяламі. Важна ўважліва вывучыць інструкцыі па выкарыстанні і выконваць усе рэкамендацыі”, — падкрэсліў ДКСЭ.