Польшча афіцыйна абвясціла аб адкрыцці двух пунктаў пропуску на мяжы з Беларуссю (дапоўнена)

14 лістапада, Позірк. Польшча афіцыйна абвясціла аб адкрыцці з 17 лістапада двух пунктаў пропуску на мяжы з Беларуссю — Кузніца Беластоцкая (Брузгі) і Баброўнікі (Бераставіца).

“Урад ідзе насустрач чаканням жыхароў і прадпрымальнікаў, у тым ліку перавозчыкаў. Гэтае рашэнне стала магчымым дзякуючы надзейнай абароне мяжы з Беларуссю”, — гаворыцца ў заяве Міністэрства ўнутраных спраў і адміністрацыі (МУСіА) Польшчы.

Адзначаецца, што абодва памежныя пераходы будуць адкрытыя для пасажырскага руху, а ў Баброўніках — таксама для “абмежаванага грузавога“.

У МУСіА лічаць, што пераходы могуць быць зноў адкрытыя цяпер, калі ўсходняя мяжа Польшчы і Еўрапейскага саюза стала больш бяспечнай, чым калі-небудзь раней. Прыводзіцца меркаванне прэм’ер-міністра Дональда Туска, які лічыць, што выгады ад адкрыцця пераходаў для польскіх грамадзян і прадпрыемстваў пераважваюць звязаныя з гэтым рызыкі. Урад будзе кантраляваць працу абодвух памежных пераходаў у мэтах бяспекі і, калі выявіць якія-небудзь рызыкі, разгледзіць пытанне аб іх паўторным закрыцці.

Ведамства мяркуе, што прынятыя Польшчай меры “дазваляюць зноў забяспечыць кантраляваную плынь людзей і тавараў праз мяжу з Беларуссю, не ставячы пад пагрозу бяспеку палякаў, нягледзячы на міграцыйны ціск з боку беларускіх і расійскіх службаў, які захоўваецца“.

Тлумачыцца, што пераход Кузніца Беластоцкая будзе адкрыты “выключна для пасажырскага руху, за выключэннем аўтобусаў“, а пераход Баброўнікі “таксама будзе адкрыты для руху аўтобусаў і грузавых аўтамабіляў з краін Еўрапейскага саюза, краін — удзельніц пагаднення аб Еўрапейскай эканамічнай прасторы і Швейцарыі“.

Зыходзячы з гэтага, можна меркаваць, што беларускія аўтобусы, як і раней, будуць прапускацца толькі праз памежны пераход Цярэспаль — Брэст, а грузавыя аўтамабілі — праз пераход Кукурыкі — Казловічы.

Таксама ў ведамстве нагадваюць, што адкрытымі застаюцца чыгуначныя пагранпераходы Кузніца Беластоцкая — Гродна, Семянуўка — Свіслач і Цярэспаль — Брэст.

28 кастрычніка Туск заявіў аб планах адкрыць два пункты пропуску на мяжы з Беларуссю — Баброўнікі (зачынены ў лютым 2023 года пасля асуджэння актывіста неафіцыйнага Саюза палякаў Беларусі, журналіста Анджэя Пачобута) і Кузніца (зачынены ў лістападзе 2021 года з-за міграцыйнага крызісу).

Аднак праз некалькі дзён, 30 кастрычніка, кіраўнік МУСіА Марцін Кервіньскі паведаміў, што Варшава адклала адкрыццё гэтых памежных пераходаў на некалькі тыдняў. У Польшчы патлумачылі гэты крок салідарнасцю з літоўскім бокам, які закрыла свае пункты пропуску на мяжы з Беларуссю праз масавыя прылёты паветраных шароў з кантрабандай, якія замінаюць грамадзянскай авіяцыі.

Сітуацыю пракаментаваў Аляксандр Лукашэнка, які абвінаваціў Варшаву ў зрыве дамоўленасцяў аб адкрыцці пунктаў пропуску на беларуска-польскай мяжы і вызваленні Пачобута.

“У нас з палякамі былі кантакты. Яны просяць там гэтых пачобутаў, шпіёнаў прызнаюць. Яны затрыманыя. “Аддайце“. Мы ім кажам: “Ну добра, там 2-3 чалавекі нашых ёсць. Вяртайце. Зробім абмен”. Таксама ж сям’і і гэтак далей. Разведка была, ёсць і будзе. Я гэта прызнаю, паважаю. Добра, абмяняем. Пачобута хочаце — мы гатовыя пайсці і на гэта. “Ой, дзякуй вам і іншае, мы гатовыя з вамі размаўляць, мы адкрываем пункты пропуску, яшчэ чагосьці“, — цытавала Лукашэнку яго прэс-служба.

Ён сцвярджаў, што пазіцыя польскага боку затым змянілася: “Учора (30 кастрычніка. — “Позірк”.) да ночы мне дакладвае КДБ: “Не, яны адступілі ад гэтай пазіцыі ў знак салідарнасці з Літвой за гэтыя вось шарыкі“. Я кажу: перадайце ім прывітанне. Адступілі — ну, і мы адступім. Мы на паўзу ставім. Калі паспееце — прыходзьце, будзем з вамі размаўляць”.