Навукоўцы маглі б узняць свой статус “на найвышэйшы ўзровень”, як сілавікі ў 2020 годзе, лічыць Лукашэнка
21 лістапада, Позірк. Разважаючы пра статус навукоўца, Аляксандр Лукашэнка “правёў паралелі з аналагічным пытаннем у дачыненні да міліцыі і вайскоўцаў, які востра стаяў у 1990-я гады”, а таксама ў 2020 годзе.
Паводле інфармацыі прэс-службы палітыка, 21 лістапада на нарадзе па пытаннях развіцця навуковай сферы і дзейнасці Нацыянальнай акадэміі навук ён адзначыў, што ў 1990-я гады “асабіста садзейнічаў падвышэнню статусу” беларускіх сілавых органаў, і гатовы рабіць гэта цяпер адносна навукоўцаў.
У той жа час Лукашэнка заявіў, што “міліцыя і вайскоўцы ў складаны перыяд 2020 года сваімі дзеяннямі самі пазначылі свой статус, устаўшы на абарону краіны і грамадства”.
“Яны тым самым узнялі свой статус на найвышэйшы ўзровень. Можа, той час не прыйшоў, можа, “2020-ы год” для навукоўцаў не наступіў, калі вы статус свой узнімеце”, — выказаў меркаванне спікер.
На думку Лукашэнкі, беларускія навукоўцы прапусцілі магчымасць узняць свой статус падчас пандэміі COVID-19, калі ён “заклікаў прайсці гэты складаны час, не паддаючыся на заклікі спыніць працу прадпрыемстваў і эканоміку ў цэлым”.
“А дзе былі вы, навукоўцы? Чаму вы не прынеслі мне гэтую ці іншую ідэю? — панаракаў ён. — Паўстае пытанне: які вам патрэбны статус? Як вы працуеце на сваю краіну?”
Кажучы пра аплату працы, палітык даў зразумець, што ад навукоўцаў патрабуецца канкрэтны вынік. “Устаньце і скажаце: каму мы не заплацілі за вялікія адкрыцці? Калі такія людзі маюцца, неадкладна разгледзім вашыя заявы і прымем адпаведнае рашэнне”, — заявіў ён.
Мірныя пратэсты грамадзян, што праходзілі ў 2020 годзе ў адказ на вынікі сфальсіфікаваных прэзідэнцкіх выбараў 9 жніўня, былі жорстка задушаныя прадстаўнікамі сілавых органаў, у краіне працягваюцца палітычныя рэпрэсіі.
Паводле даных праваабаронцаў на канец верасня, з 2020 года сама меней 8.905 чалавек сутыкнулася з крымінальным пераследам з палітычных матываў. Не менш за 7.565 з іх былі вынесеныя палітычна матываваныя выракі, у тым ліку завочна.
