УНС заслухае пасланне Лукашэнкі, зацвердзіць праграму развіцця краіны і кадравыя змены вышэйшых судоў
25 лістапада, Позірк. Прэзідыум Усебеларускага народнага сходу (УНС) сабраў 25 лістапада Аляксандр Лукашэнка для падрыхтоўкі “змястоўнай часткі” пасяджэння УНС, якое плануецца правесці 18–19 снежня.
Паводле інфармацыі прэс-службы палітыка, на снежаньскім пасяджэнні Лукашэнка выступіць са зваротам да народа і парламента.
Дэлегаты УНС таксама маюць зацвердзіць праграму сацыяльна-эканамічнага развіцця Беларусі на наступныя пяць гадоў, дэталі якой абмяркоўваліся на нарадзе 10 лістапада.
“Дыскусія, што адбылася, дала магчымасць выслухаць альтэрнатыўныя пункты гледжання. Разумныя прапановы ўлічаныя. Як і ставілася задача, праграма скіраваная на падвышэнне дабрабыту і якасці жыцця людзей”, — заявіў Лукашэнка, на даручэнне якога дапрацаваная праграма перададзеная дэлегатам УНС. Тыя ў сваю чаргу “на месцах павінны актыўна падключыцца да яе абмеркавання”.
Акрамя таго, УНС мае абраць новага члена прэзідыума “замест выбылага”, а таксама прагаласаваць па “кадравых прапановах вышэйшых судоў”, якія на пасяджэнні прадставяць старшыня Канстытуцыйнага суда Пётр Міклашэвіч і старшыня Вярхоўнага суда Валянцін Сукала.
Даты правядзення другога пасяджэння VII УНС зацверджаныя ў сярэдзіне кастрычніка. Упершыню гэта было зроблена распараджэннем Лукашэнкі, які з’яўляецца старшынёй гэтага органа. Першае пасяджэнне VII УНС — у красавіку 2024 года — склікаў Цэнтрвыбаркам.
Сёлета 11 лютага на пасяджэнні прэзідыума УНС Лукашэнка паведаміў, што чарговы сход запланаваны на красавік 2025-га, аднак ён не адбыўся.
Усебеларускі народны сход склікаецца з ініцыятывы Лукашэнкі з 1996 года, як правіла, у перыяд палітычных кампаній.
УНС атрымаў канстытуцыйны статус па выніках не прызнанага дэмакратычнымі краінамі рэферэндуму 27 лютага 2022 года. Старшынёй прэзідыума сходу ў 2024-м практычна аднагалосна абраны Лукашэнка.
Паводле абноўленай рэдакцыі Канстытуцыі, УНС з’яўляецца “найвышэйшым прадстаўнічым органам народаўладдзя”, які вызначае “стратэгічныя кірункі развіцця грамадства і дзяржавы”, забяспечвае “непахіснасць канстытуцыйнага ладу, пераемнасць пакаленняў і грамадзянскую згоду”. Максімальная колькасць дэлегатаў УНС — 1.200, тэрмін іх паўнамоцтваў — пяць гадоў. Пасяджэнні УНС маюць праводзіцца не радзей за адзін раз у год.
УНС зацвярджае асноўныя напрамкі ўнутранай і знешняй палітыкі, ваенную дактрыну, канцэпцыю нацыянальнай бяспекі, праграмы сацыяльна-эканамічнага развіцця; заслухоўвае штогадовыя пасланні прэзідэнта да парламента; мае права заканадаўчай ініцыятывы, можа прапаноўваць змены і дапаўненні ў Канстытуцыю, разглядаць пытанне пра легітымнасць выбараў ды інш.
