28 лістапада, Позірк. Еўрапейскі саюз рыхтуе новы пакет санкцый у дачыненні да Беларусі, паведаміў прадстаўнік аб’яднання BelPol Уладзімір Жыгар на сваёй старонцы ў “Фэйсбуку”.
Паводле яго інфармацыі, мэтай санкцый з’яўляецца спроба “перакрыць усе шчыліны”, праз якія рэжым Аляксандра Лукашэнкі дапамагае Расіі ў вайне супраць Украіны.
Чакаецца, што ЕС увядзе “забарону на новыя віды тавараў і тэхналогій двайнога прызначэння, у тым ліку кампаненты, якія ўжо выкарыстоўваліся Расіяй у вайне”.
Акрамя таго, адзначае Жыгар, пад забарону трапіць “транзіт праз Беларусь тавараў, якія здольныя ўзмацніць ваенную прамысловасць”, таксама будуць абмежаваныя пастаўкі ў Беларусь асобных відаў праграмнага забеспячэння.
Прадстаўнік BelPol сцвярджае, што разглядаецца магчымасць “пастрожання імпарту алюмінію; пашырэння забароны на будаўнічыя паслугі для кампаній з ЕС; поўнай забароны грузаперавозак у ЕС для кампаній, дзе 25% і больш належаць беларускім уладальнікам”.
Акрамя гэтага, паводле слоў Жыгара, плануецца “пашырэнне персанальнага санкцыйнага спісу — у яго трапяць усе, хто атрымлівае выгаду ад ВПК” і “ўзмацненне кантролю фінансавых аперацый беларускіх кампаній у ЕС”.
“Спіс не поўны. Будуць і іншыя сюрпрызы”, — падкрэсліў прадстаўнік аб’яднання.
Работа над новым пакетам санкцый супраць РФ і Беларусі ўжо вядзецца, заявіла еўрапейскі камісар па пытаннях фінансавай стабільнасці, фінансавых паслуг і саюза рынкаў капіталу Марыя Луіш Албукерке 7 лістапада ў Вільнюсе па выніках сустрэчы з міністрам фінансаў Літвы Крыступасам Вайцекунасам.
Такім чынам чыноўніца адказала на пытанне, чаго можна чакаць ад новых абмежавальных мер у дачыненні да Мінска.
“Мы толькі што ўхвалілі 19-ы пакет санкцый і прыступаем да працы над наступным, — падкрэсліла еўракамісар. — Пакуль рана казаць пра ягоны змест і пра тое, калі ён будзе вынесены на абмеркаванне і зацвярджэнне. Аднак магу вас запэўніць, што мы ўжо над гэтым працуем”.
“У той жа час мы працягнем працу па барацьбе з абыходнымі захадамі. Ведаеце, нават калі санкцыі ўхвалены, ёсць трэція краіны, якія дапамагаюць іх абыходзіць. Гэта частка нашай бесперапыннай працы. [Мы працягваем працаваць, спрабуючы] знайсці шляхі, супрацоўнічаць з трэцімі краінамі, каб прадухіліць гэта, і кантраляваць гэты працэс, паколькі многія асобы, што падтрымліваюць гэта парушэнне, будуць уключаны ў будучыя пакеты санкцый”, — дадала яна.
Як паведамляў “Позірк”, у 19-ы санкцыйны пакет ЕС супраць Расіі, прыняты 23 кастрычніка, унесеныя тры беларускія банкі — ЗАТ “Альфа-Банк” (брэнд “Альфа Банк у Беларусі”), “Сбер Банк (Беларусь)” і “Банк ВТБ (Беларусь)” (абмежавальныя меры пачнуць дзеянне 2 снежня). У рамках гэтага пакета таксама былі згаданыя Банк “БелВЭБ” і “Белгазпрамбанк”, якія трапілі пад абмежавальныя захады ў лютым гэтага года.
Акрамя таго, пад абмежавальныя захады трапілі старшыня канцэрна “Белнафтахім” Ілля Ікан і генеральны дырэктар холдынга “Гарызонт” Юрый Прадко, а таксама сам “Гарызонт”, арганізацыі “Інстытут лічбавага тэлебачання “Гарызонт” і “Галаграфічная індустрыя”.
Санкцыі ўведзены “ў сувязі з сітуацыяй у Беларусі і ўдзелам Беларусі ў расійскай агрэсіі супраць Украіны”.
5 лістапада міністр замежных спраў Літвы Кястуціс Будрыс паведаміў журналістам, што Вільнюс прадставіў калегам з ЕС прапановы аб тым, як павінны выглядаць новыя санкцыі, якія прымяняюцца да Беларусі на міжнародным узроўні.
“Мы прадставілі свой пакет прапаноў, што змяшчае як канкрэтныя фармулёўкі, так і эфект, — заявіў кіраўнік літоўскай дыпламатыі. — Літва не пачатковец у тэме санкцый. І пакеты мер, і прадстаўленыя намі аргументы ўспрымаюцца сур’ёзна. Нам давяраюць”.
Паводле слоў чыноўніка, Вільнюс спадзяецца, што “магчыма, падрыхтаваны пакет паўплывае яшчэ да таго, як будзе прынята канчатковае рашэнне аб санкцыях”.
Не выключана, лічыць Будрыс, што рэжым Лукашэнкі “зробіць высновы” да таго, як будуць задзенічаныя “ўсе гэтыя меры”.
Якіх сфер датычацца прапановы па новых абмежавальных мерах, не ўдакладнялася.
Напрыканцы кастрычніка Будрыс заявіў, што спадзяецца на прагрэс Еўракамісіі ў пытанні санкцый супраць Беларусі да канца лістапада.
