29 лістапада, Позірк. Прарасійскі журналіст з латвійскім грамадзянствам Юрый Аляксееў атрымаў статус уцекача ў Беларусі.
29 лістапада, на сваё 67-годдзе, мужчына апублікаваў на старонцы ў “Фэйсбуку” фатаграфію пасведчання ўцекача і частку дакумента за подпісам начальніка Дэпартамента па грамадзянстве і міграцыі Міністэрства ўнутраных спраў Івана Новікава.
Як вынікае з дакумента, міліцэйскі чыноўнік загадаў “надаць Аляксееву Юрыю, 1958 г.н., грамадзяніну Латвійскай Рэспублікі, статус уцекача ў Рэспубліцы Беларусь у адпаведнасці з часткай першай артыкула 19 Закона, бо заяўнік мае абгрунтаваную боязь стаць ахвярай пераследаў ў дзяржаве грамадзянскай прыналежнасці на падставе яго палітычных перакананняў і не жадае карыстацца абаронай гэтай дзяржавы”.
Фатаздымак Аляксееў суправадзіў паведамленнем: “ПОЛУЧИЛ ПОДАРОК К ДНЮ РОЖДЕНЬЯ Поздравляйте!” (захаваная арфаграфія аўтара).
Пра тое, што Юрый Аляксееў уцёк з Рыгі ў Беларусь, стала вядома 27 кастрычніка 2024 года з паведамлення грамадзяніна Латвіі, што даўно з’ехаў у РФ, спецыяльнага карэспандэнта прапагандысцкай медыягрупы “Россия сегодня” Аляксея Стэфанава.
Стэфанаў тады сцвярджаў, што Аляксеева ў Латвіі маглі неўзабаве “накіраваць у турму на год і месяц за нібыта распальванне варожасці” — за каментарыі, якія “ад яго імя” пісалі невядомыя “з заклікамі знішчаць латышоў”. Акрамя таго, паводле яго слоў, “па справе ІМХАклуба” Аляксеева “маглі кінуць за краты <…> на 7–8 гадоў паводле артыкула пра нанясенне шкоды Латвійскай Рэспубліцы групай асоб з папярэдняй змовы”.
“Як кажа Юра, тры ночы ён не спаў — рыхтаваўся да ўцёкаў. Учора ранкам выйшаў з кватэры ў Рызе, дабраўся на перакладных да Вільнюса, купіў квіток на аўтобус да Мінска і, хвалюючыся, прайшоў мяжу. Цяпер Юра ў Мінску ў сяброў. Выспаўся і прыходзіць у сябе”, — заяўляў спецкар расійскага медыя, які называе ўлады Латвіі “фашысцкім рэжымам”.
На наступны дзень пасля ўцёкаў Аляксеева стала вядома, што Курземскі раённы суд у Вентспілсе (Латвія) абвясціў мужчыну ў вышук пасля таго, як той не з’явіўся на пасяджэнне па справе аб “распальванні варожасці”.
Ураджэнец Нарыльска (цяпер РФ) Юрый Аляксееў у Латвіі ў розны час быў галоўным рэдактарам выданняў “Бизнес&Балтия”, “Коммерсант Baltic”, “Бизнес.lv”. Таксама ён стварыў і ўзначальваў праект Imhoclub.lv, які прасоўваў пракрамлёўскія наратывы. Улады Латвіі заяўлялі, што медыя фінансуецца з Расіі.
Справа аб “распальванні варожасці” ў дачыненні да Аляксеева была ўзбуджаная ў 2017 годзе. Падчас вобшуку па месцы жыхарства журналіста былі знойдзеныя патроны для пісталета. Таксама паведамлялася пра знойдзеныя ў яго кампутары матэрыялы з дзіцячай парнаграфіяй.
У студзені 2023 года Рыжскі раённы суд прыгаварыў Аляксеева па сукупнасці абвінавачанняў да аднаго года і аднаго месяца пазбаўлення волі. Пры гэтым ён застаўся на волі — над ім ўсталявалі ўмоўна-датэрміновы нагляд на адзін год.
Раней Аляксееў называў сябе “на чвэрць беларусам”, кампліментарна выказваўся пра Аляксандра Лукашэнку.
