Дырэктару віцебскага прадпрыемства пагражае да 12 гадоў зняволення за крадзяжы

3 снежня, Позірк. Крадзяжы сродкаў на суму звыш 250 тыс. рублёў зафіксаваныя на адным з прадпрыемстваў Віцебска, паведамляе Міністэрства ўнутраных спраў.

Першапачаткова шкода ацэньвалася ў 50 тыс. рублёў, але падчас расследавання ўстаноўленыя “дадатковыя факты, якія ўказваюць на больш маштабныя махінацыі”, адзначае ведамства.

“Дадаткова выяўлены ўрон перавысіў 200 тыс. рублёў”, — гаворыцца ў паведамленні.

Паводле версіі следства, 44-гадовы дырэктар прадпрыемства “разам з саўдзельнікамі па адпрацаваным алгарытме заключалі фіктыўныя здзелкі з прадпрымальнікамі на выкананне работ”. “На самай справе абумоўленыя паслугі не аказваліся, а грошы, пералічаныя ў якасці аплаты, змоўшчыкі дзялілі паміж сабой”, — паведамляе МУС.

Распачатая крымінальная справа за “крадзеж шляхам злоўжывання службовымі паўнамоцтвамі”. Фігурантам пагражае да 12 гадоў пазбаўлення волі, адзначае ведамства.

Паводле звестак Вярхоўнага суда, якія раней прыводзіў “Позірк”, у студзені — чэрвені 2025 года за ўчыненне карупцыйных злачынстваў асуджана 304 чалавекі — на 7,3% менш, чым за той жа перыяд 2024-га (328). З іх 84 прыгавораныя да пазбаўлення волі.