Вярхоўны суд пакінуў у сіле прыгавор у фігурантам справы сэрвісу “Письмо.бел“ за “экстрэмізм“

4 снежня, Позірк. Аб уступленні ў сілу прыгавору ў дачыненні да фігурантаў крымінальнай справы сэрвісу “Письмо.бел“ паведаміла прэс-служба Генеральнай пракуратуры 4 снежня.

Затрыманыя ў лістападзе 2024 года фігуранты былі прызнаныя Мінскім абласным судом вінаватымі паводле арт. 361¹ КК (стварэнне экстрэмісцкага фарміравання або ўдзел у ім). Аляксандр Мазур і Павел Каранюхін асуджаныя на 3,5 гады пазбаўлення волі, Аляксандр Лыкшын — на тры гады і сем месяцаў. Усе трое прызнаны палітвязнямі.

Судовая калегія па крымінальных справах Вярхоўнага суда “разгледзела ў апеляцыйным парадку крымінальную справу аб садзейнічанні экстрэмісцкай дзейнасці па скаргах абаронцаў <…> прыгавор суда першай інстанцыі пакінуты без змены, а апеляцыйная скарга — без задавальнення”.

У прыватнасці, іх абвінавачвалі ў размяшчэнні для “садзейнічання экстрэмісцкай дзейнасці” ў інтэрнэце на падкантрольным ім інфармацыйным рэсурсе “Ліст.бел” публікацыі “экстрэмісцкіх фарміраванняў”.

Акрамя таго фігуранты прызнаныя вінаватымі ў тым, што арганізавалі “ў інтарэсах такіх фарміраванняў <…> накіраванне “лістоў падтрымкі” асобам, якія ўтрымліваліся ва ўстановах Дэпартамента выканання пакаранняў МУС за ўчыненне экстрэмісцкіх злачынстваў”.

Мэтай такіх дзеянняў, лічыць Генпракуратура, было забеспячэнне “рэабілітацыі змешчаных у пенітэнцыярныя ўстановы асоб у вачах грамадскасці, ухваленне і заахвочванне экстрэмісцкай дзейнасці”.

15 лістапада стала вядома, што сэрвіс “Письмо.бел” прызнаны “экстрэмісцкімі матэрыяламі”.

У верасні 2022 года спыніла дзейнасць ініцыятыва па перасылцы карэспандэнцыі палітвязням “Лісты ў клетачку”.