“Белавія” адновіць палёты ў Тэль-Авіў з 8 студзеня
5 снежня, Позірк. Нацыянальная авіякампанія “Белавія” абвясціла аб аднаўленні з 8 студзеня 2026 года рэгулярных рэйсаў у Тэль-Авіў (Ізраіль).
Як адзначае прэс-служба перавозчыка, рэйсы будуць выконвацца два разы на тыдзень, у чацвер і нядзелю: вылет з Мінска — у 07:10, прыбыццё — у 12:20; вылет з Тэль-Авіва — у 13:15, прыбыццё — у 20:40.
Працягласць палёту складзе 6 гадзін 10 хвілін і 6 гадзін 25 хвілін адпаведна.
Рэйсы будуць выконвацца на самалётах “Боінг 737-8”.
На дадзены момант квіткі па тарыфе “Лайт” распрадаюцца па 671 рублю ў адзін бок і ад 1.327 рублёў у два бакі.
Раней паведамлялася, што ізраільская авіякампанія Arkia абвясціла аб запуску прамога рэйса з Тэль-Авіва ў Мінск з лютага 2026 года.
У чэрвені гэтага года гендырэктар кампаніі “Белавія” Ігар Чаргінец заявіў: “У Ізраіль нас не пускалі і не пускаюць ізраільскія ўлады, хоць <…> мы б хацелі”.
15 мая амбасадар Беларусі ў Ізраілі Юрый Ярашэвіч і генеральны дырэктар Дэпартамента грамадзянскай авіяцыі Ізраіля Шмуэль Закай абмеркавалі перспектывы супрацоўніцтва ў сферы грамадзянскай авіяцыі. Падрабязнасці перамоў МЗС Беларусі не прыводзіў. Ізраільскі бок аб сустрэчы не згадваў
Паводле паведамлення газеты The Jerusalem Post, аб аднаўленні прамых рэйсаў авіякампаніі “Белавія” ў Ізраіль з 1 чэрвеня гэтага года Ярашэвіч заяўляў 21 красавіка на сустрэчы з ізраільскім прэзідэнтам Іцхакам Герцагам падчас уручэння даверчых грамат.
У цяперашні час з Мінска ў Тэль-Авіў пасажыры ў асноўным лётаюць праз Баку або Тбілісі.
30 траўня 2022 года “Белавія” паведаміла, што авіяцыйныя ўлады Ізраіля адмовілі ў абслугоўванні самалётаў у аэрапорце Бэн Гурыён, у сувязі з чым авіякампанія вымушаная адмяніць раней запланаваныя рэйсы ў Тэль-Авіў.
Адзначалася, што Ізраіль паведаміў аб сваім рашэнні, нягледзячы на тое што першапачаткова, 15 траўня 2022 года, быў выдадзены афіцыйны дазвол на палёты і зацверджана праграма рэйсаў па новым раскладзе (з тэхнічнай пасадкай у Баку). Беларуская амбасада заявіла, што рашэнне ізраільскіх уладаў не абслугоўваць самалёты “Белавія” ў першую чаргу “ударыць па інтарэсах простых грамадзян”, паколькі на палёты паміж Мінскам і Тэль-Авівам заўсёды быў вялікі попыт.
Да таго часу беларускі нацыянальны перавозчык ужо знаходзіўся пад санкцыямі спачатку асобных краін Еўропы, у адказ на прымусовую пасадку рэйса FR4978 па маршруце Афіны — Вільнюс 23 траўня 2021 года, а са снежня 2021 года — і пад санкцыямі Еўрасаюза.
16 чэрвеня 2022 года “Белавія” трапіла пад амерыканскія санкцыі, што з улікам цесных сувязяў паміж Ізраілем і ЗША зрабіла фактычна немагчымым ажыццяўленне палётаў паміж Мінскам і Тэль-Авівам, у прыватнасці на самалётах “Боінг” беларускага перавозчыка.
У 2025 годзе амерыканскія санкцыі з авіякампаніі былі знятыя.
