Скарочаны пералік тавараў з рэгуляванымі цэнамі

5 снежня, Позірк. Пералік тавараў, якія падлягаюць цэнаваму рэгуляванню, скарачаецца ў Беларусі з 211 да 199 пазіцый (-5,7%). Гэта прадугледжана пастановай урада ад 3 снежня 2025 года № 701. Дакумент апублікаваны на Нацыянальным прававым інтэрнэт-партале.

Такім чынам, змены ў дзеючую сістэму рэгулявання цэн унесены сёмы раз.

Гэта, як сцвярджаецца, зроблена з улікам “балансу інтарэсаў дзяржавы і ўдзельнікаў спажывецкага рынку”.

З-пад цэнавага рэгулявання выведзеныя харчовая соль і сода, спіртовы воцат, купальныя касцюмы, мужчынскі, жаночы і дзіцячы гумовы абутак, махровыя ручнікі, мясарубкі, блэндары, фены для валасоў, цвёрдае гаспадарчае мыла, зменныя картрыджы для ачысткі вады.

Захаваецца рэгуляванне цэн на марожаную раздзеланую рыбу, за выключэннем стэйкаў, а таксама рыбу ласасёвых, асятровых, тунцовых парод. Застанецца цэнавае рэгуляванне на філе, якое адносіцца да раздзелкі; сокі і нектары, акрамя прамога адціску, частку канцылярскіх тавараў.

Таксама выключаюцца з цэнавага рэгулявання тавары, што рэалізуюцца ў цягніках, што курсуюць у міжнародных зносінах, павялічваюцца максімальныя гандлёвыя надбаўкі на дзіцячыя цацкі і лінолеўм — на 5% і 20% адпаведна.

Згодна з дакументам, “у мэтах недапушчэння спекулятыўнага і неабгрунтаванага росту цэн” урад бярэ пад кантроль павышэнне вытворцамі цэн на агуркі і памідоры. Далейшае павышэнне цэн на гэтыя тавары звыш 0,3% у месяц “неабходна абгрунтаваць Камісіі па пытаннях дзяржаўнага рэгулявання цэнаўтварэння пры Савеце міністраў”.

Адмяняецца адміністрацыйная працэдура “ўзгаднення рэалізацыі спажывецкіх тавараў, вырабленых на тэрыторыі Беларусі, для мэт іх наступнай рэалізацыі за межамі краіны”.

Таксама перастануць дзейнічаць абмежаванні на прадстаўленне стымулюючых выплат (узнагароджання) на імпартаваныя нехарчовыя тавары “ў сувязі з набыццём у пастаўшчыка пэўнай колькасці тавараў, за аказанне паслуг па прасоўванні тавараў і іншых відаў узнагароджанняў”.

Да канца 2026 года працягваецца права аблвыканкамаў і Мінаблвыканкама зацвярджаць пералік аперацый і арганізацый, паміж якімі дазволены таварна-абменныя аперацыі.

Скарэкціраваныя падыходы да фарміравання цэн нарыхтоўшчыкамі і пастаўшчыкамі, якія не з’яўляюцца вытворцамі, а таксама нарыхтоўшчыкамі для выканання дзяржаўнай замовы, прадугледжаныя пастановай урада ад 22 ліпеня 2025 года № 399 “Аб парадку і ўмовах пастаўкі плодаагародніннай прадукцыі са стабілізацыйных фондаў тавараў для рэспубліканскіх дзяржаўных патрэб”.

Змены пачынаюць дзейнічаць пасля афіцыйнага апублікавання пастановы ўрада, г.зн. з 6 снежня.

Дзеючая ў краіне сістэма рэгулявання цэн у красавіку была скарэкціраваная ў шосты раз. Адпаведную пастанову ўрада № 713 (6) падпісаў прэм’ер-міністр Аляксандр Турчын. Тады пералік тавараў, якія падлягаюць цэнаваму рэгуляванню, быў скарочаны з 331 да 211 пазіцый (на 36,3%).

З-пад цэнавага рэгулявання былі выключаныя тавары, што рэалізуюцца рэзідэнтам Беларусі для наступнай пастаўкі на экспарт (пасля ўзгаднення такой здзелкі з адпаведным дзяржаўным органам), і тавары, якія прадаюцца ў стэрыльнай зоне аэрапортаў.

За 10 месяцаў 2025 года парушэнні ў гэтай сферы былі выяўленыя ў 248 суб’ектаў гаспадарання, у тым ліку сем фактаў рэалізацыі прадукцыі за межы Беларусі па цэнах ніжэй усталяваных мінімальных.

Тады адзначалася, што штрафныя санкцыі па разгледжаных адміністрацыйных справах склалі больш за 420 тыс. рублёў (з улікам матэрыялаў папярэдніх гадоў).

6 кастрычніка 2022 года Аляксандр Лукашэнка па выніках нарады па цэнавай сітуацыі ў краіне падпісаў дырэктыву № 10 “Аб недапушчэнні росту цэн”.

Пастановай урада ад 19 кастрычніка 2022 года № 713 “Аб сістэме рэгулявання цэн” было ўведзена рэгуляванне цэн на тавары ўсёй спажывецкай карзіны. Пазней у дакумент неаднаразова ўносіліся змены: з яго былі выключаны некаторыя групы тавараў, падкарэктаваныя правілы рэгулявання цэн.