Аэрапорт Мінска папярэдзіў пра магчымыя змены ў раскладзе рэйсаў праз абмежаванні на палёты ў РФ
11 снежня, Позірк. Нацыянальны аэрапорт Мінск папярэдзіў пра магчымыя змены ў раскладзе рэйсаў у сувязі з “абмежаваннямі па выкарыстанні паветранай прасторы Расійскай Федэрацыі”.
Прэс-служба транспартнага вузла заклікала пасажыраў, асоб, што сустракаюць і праводзяць, “улічваць гэтую інфармацыю і планаваць паездку <…> згодна з наяўнымі ўмовамі”, а таксама рэкамендавала “сачыць за актуальным раскладам і статусам патрэбнага рэйса на табло вылетаў/прылётаў на сайце аэрапорта або авіякампаніі”.
“Персанал аэрапорта робіць максімальныя высілкі для найхутчэйшага забеспячэння ўсіх вытворчых працэсаў па абслугоўванні рэйсаў для мінімізацыі адхіленняў ад раскладу палётаў, — гаворыцца ў паведамленні. — Нацыянальны аэрапорт Мінск просіць прабачэння за нязручнасці ў існых абставінах і просіць пасажыраў паставіцца з разуменнем да цяперашняй сітуацыі. Гарантаванне бяспекі палётаў — безумоўны прыярытэт”.
Паводле інфармацыі авіяцыйных уладаў РФ і расійскіх СМІ, у ноч на 11 снежня абмежаванне на рух самалётаў было ўведзена сама меней у 10 аэрапортах, у тым ліку чатырох маскоўскіх. Прычынай стала атака дронаў з боку Украіны ў адказ на агрэсіўныя дзеянні Крамля, які амаль чатыры гады вядзе поўнамаштабную вайну супраць украінскага народа.
