Ад пачатку года Беларусь дэпартавала 3 тыс. замежнікаў — кіраўнік МУС
Іван Кубракоў
20 снежня, Позірк. Ад пачатку 2025 года “меры ў выглядзе добраахвотнай або прымусовай дэпартацыі” прымененыя да 3 тыс. замежнікаў, заявіў міністр унутраных спраў Іван Кубракоў на палях цырымоніі адкрыцця абноўленага адміністрацыйнага будынка ўпраўлення па грамадзянстве і міграцыі УУС Гомельскага аблвыканкама.
Паводле слоў чыноўніка, якія прыводзіць прэс-служба МУС, Беларусь вядзе “адкрытую і добразычлівую міграцыйную палітыку”.
“Мы заўсёды радыя гасцям, якія прыязджаюць да нас для адпачынку, навучання або працы. Пераважная большасць паводзіцца годна, — адзначыў ён. — Аднак адкрытасць не азначае ўсёдазволенасці. Кожны замежнік у нашай краіне атрымлівае тлумачэнні правілаў паводзін і асаблівасцяў заканадаўства. З парушальнікамі мы размаўляем коратка і дзейнічаем жорстка: спачатку папярэджваем, а ў выпадку паўтарэння — абавязваем пакінуць рэспубліку”.
Сярод іншага Кубракоў заявіў, што “з прычыны блізкасці да зоны баявых дзеянняў” гарантаванне бяспекі ў Гомельскай вобласці “патрабуе асаблівай увагі і дадатковых захадаў”. “Хачу асабліва падкрэсліць: мы робім усё для падтрымання правапарадку на сваёй тэрыторыі і абароны грамадзян. Каб людзі, якія выбіраюць Беларусь, адчувалі сябе тут спакойна і камфортна”, — сказаў міністр.
Варта адзначыць, што апошнім часам рэжым Аляксандра Лукашэнкі практыкуе дэпартацыю ўласных грамадзян. У прыватнасці, палітвязняў, якіх вызваляюць у выніку перагавораў з прадстаўнікамі адміністрацыі прэзідэнта ЗША Дональда Трампа, адразу ж вывозяць з краіны — часцяком без дакументаў.
Адказваючы на пытанні ўдзельнікаў другой сесіі VII Усебеларускага народнага сходу 18 снежня, Лукашэнка прызнаўся, што пашпарты палітвязням, якіх вызваляюць і высылаюць з краіны, не аддаюць свядома.
“Яны (асуджаныя з палітычных матываў. — “Позірк”.) нам не патрэбныя. Калі гэта вашыя людзі, забірайце, калі ласка, вывозіце іх там, што хочаце, то і рабіце. Выехаў — гвалтам крычаць: а пашпартоў няма! Дык а што мы вам, пашпарты павінны выпісваць, сваім ворагам?” — сказаў палітык, які ў верасні 2023 года сваім указам забараніў афармляць пашпарты ў беларускіх замежных установах.
Лукашэнка паведаміў, што ў вывезеных з краіны не будзе магчымасці вярнуцца, каб яны не стваралі праблем, у тым ліку яму: “Сюды яны не трапяць, няхай там ваююць”. “2020 года больш не будзе”, — сказаў ён. Паводле слоў палітыка, ён не прыняў прапанову амерыканцаў даць магчымасць памілаваным у рамках дамоўленасцяў з Вашынгтонам застацца ў краіне.
Акрамя таго, Лукашэнка прыгразіў закрыць уезд тым, хто эміграваў, але перыядычна прыязджае на радзіму: “Мы ўсякія перамяшчэнні гэтых людзей сюды забаронім, і зубы будуць лячыць там — нават пры абмежаваным заробку, пасудамыйкі там і г. д. Усё там. Пайшлі [у эміграцыю] — паспрабуйце. Хочаце — да [генеральнага пракурора] Шведа, у камісію [па вяртанні]. Скажуць “так” — значыць, так, “не” — значыць, не”.
За парушэнні правілаў дарожнага руху з Беларусі высылаюць замежнага студэнта
23 верасня, Позірк. Пра прымусовую высылку з Беларусі 19-гадовага замежнага студэнта паведаміла 23 верасня ведамасная газета МУС "На варце". Адзначаецца, што нагодай паслужыла "сістэматычнае парушэнне заканадаўства". "Малады чалавек прыбыў у Беларусь для навучання менш за год таму, — гаворыцца ў …
