Падчас праверкі ўнутраных войскаў асаблівая ўвага нададзена “супрацьдзеянню беспілотнікаў праціўніка”

9 студзеня, Позірк. Аб завяршэнні “раптоўнай праверкі” гатоўнасці ўнутраных войскаў (УВ), “злучэнняў і воінскіх часцей, а таксама атрадаў спецназа, якія знаходзяцца на паўднёвых рубяжах, да дзеянняў у няштатных умовах” паведамляе Міністэрства ўнутраных спраў.

Адзначаецца, што дзеянні камандзіраў і асабістага складу атрымалі “высокую ацэнку” кіраўніцтва ведамства.

У відэароліку, размешчаным у тэлеграм-канале МУС, паведамляецца, што падраздзяленням трэба было “выканаць задачы па выяўленні, блакаванні і ліквідацыі незаконных узброеных фарміраванняў і дыверсійна-разведвальных груп умоўнага праціўніка”.

Усе баявыя задачы суправаджаліся баявой стральбой і выконваліся “як днём, так і ноччу ва ўмовах абмежаванай бачнасці”.

Асаблівая ўвага “нададзена прымяненню беспілотных лятальных апаратаў, а таксама супрацьдзеянню беспілотнікаў праціўніка”.

Як паведамлялася раней, праверка ўнутраных войскаў і “некаторых падраздзяленняў органаў унутраных спраў” па гатоўнасці дзеянняў у “асаблівых умовах” пачалася ў Беларусі 8 студзеня па рашэнні кіраўніка МУС Івана Кубракова.

Усе падраздзяленні ўнутраных войскаў паднятыя па трывозе, паведаміў міністр у відэакаментарыі, размешчаным у неафіцыйным тэлеграм-канале прэс-службы Аляксандра Лукашэнкі.

Мерапрыемствы, паводле сцвярджэння Кубракова, носяць планавы характар: правяраецца працаздольнасць тэхнікі, зладжанасць дзеянняў асабістага складу, гатоўнасць УВ да процідзеяння дыверсійна-разведвальным групам (ДРГ).

Унутраныя войскі былі актыўна задзейнічаныя ў падаўленні масавых пратэстаў у 2020 годзе, яны таксама прыцягваліся да разгонаў вулічных акцый у ранейшыя гады.

З канца 2022 года ў складзе УВ актыўна ствараюцца новыя спецпадраздзяленні, у першую чаргу з ліку кантрактнікаў, якія раней адслужылі ва ўнутраных войсках. Вядома не менш чым пра 12 такіх падраздзяленнях.

Рэжым Лукашэнкі практычна безупынна праводзіць вучэнні, трэніроўкі, зборы на фоне абвастрэння адносін з Захадам (акрамя ЗША пасля прыходу да ўлады прэзідэнта Дональда Трампа) і поўнамаштабнай вайны Расіі супраць Украіны.