Беларуску ў Варшаве абвінавацілі ў гвалце над мужам-украінцам

23 студзеня, Позірк. Аб затрыманні 38-гадовай грамадзянкі Беларусі, падазраванай у шматгадовым гвалце над мужам, грамадзянінам Украіны, паведаміла паліцыя раёна Жалібож на поўначы Варшавы.

Пацярпелы, які звярнуўся ў паліцыю, паведаміў, што больш за сем гадоў падвяргаўся як фізічнаму, так і псіхалагічнаму гвалту з боку жонкі, якая “неаднаразова без прычыны пачынала скандалы, абражала яго вульгарнымі і зневажальнымі словамі, тузала, штурхала, а таксама збівала рознымі прадметамі, у тым ліку малатком, качалкай і малатком для адбівання мяса, і пагражала пазбаўленнем жыцця і здароўя“.

Паведамляецца, што “грамадзянін Украіны вырашыў перапыніць маўчанне і распавесці пра сваю сітуацыю супрацоўнікам паліцыі, якія неадкладна прынялі меры па гэтай справе”.

У выніку пасля збору доказаў пракурор ужыў да беларускі паліцэйскі нагляд, а таксама забараніў набліжацца да пацярпелага.

Беларусцы было прад’яўлена абвінавачанне ў псіхалагічным і фізічным катаванні мужа. Адзначаецца, што ёй пагражае да пяці гадоў пазбаўлення волі.

Працэсуальныя дзеянні па справе знаходзяцца пад наглядам пракуратуры раёна Жолибож.