Каранкевіч: У 25 населеных пунктах працягваецца аднаўленне электразабеспячэння

28 студзеня, Позірк. У 450 (з 475) населеных пунктах Беларусі адноўлена электразабеспячэнне пасля яго парушэння з-за ледзянога дажджу, заявіў намеснік прэм’ер-міністра Віктар Каранкевіч 28 студзеня.

“У 25 населеных пунктах працы яшчэ вядуцца, — цытуе чыноўніка прэс-служба ўрада. — А пакуль падключана 84 трансфарматарныя падстанцыі, задзейнічана чатыры дызель-генератарныя ўстаноўкі для забеспячэння электразабеспячэння ад мабільных крыніц”.

Ён адзначыў, што работы вядуць 56 брыгад. “Задача — на працягу сённяшняга дня цалкам забяспечыць аднаўленне электразабеспячэння ў гэтых населеных пунктах”, — падкрэсліў Каранкевіч.

Паводле яго слоў, цяперашняе павышэнне тэмпературы да нуля градусаў і значныя ападкі ў выглядзе дажджу, мокрага снегу прыводзіць да абледзянення дрэў і ліній электраперадачы. Праз гэта “ўзрастае імавернасць падзення дрэў на лініі электраперадачы, што прыводзіць да парушэння электразабеспячэння спажыўцоў”.

Найбольш пацярпелыя — Мінская, Гомельская і часткова Віцебская вобласці.

Белгідрамет выпусціў штармавое папярэджанне аб захаванні галалёду і галалёдзіцы 29 студзеня (аранжавы ўзровень небяспекі). Папярэджанне дзейнічала 26, 27 і 28 студзеня. У найбліжэйшыя дні прагназуецца значнае пахаладанне. У першыя дні лютага матэматычныя прагнастычныя мадэлі не выключаюць 30-градусных маразоў.