У Гомелі з доказамі злачынства затрыманы 21-гадовы іншаземец — распаўсюднік псіхатропу

2 лютага, Позірк. У Гомелі супрацоўнікі наркакантролю пры падтрымцы АМАПа затрымалі з доказамі злачынства 21-гадовага замежніка — распаўсюдніка псіхатропу, паведамляе прэс-служба Міністэрства ўнутраных спраў.

Грамадзянін адной з краін Цэнтральнай Азіі, як сцвярджае ведамства, “з’яўляючыся аптова-рознічным кур’ерам інтэрнэт-наркашопа, на ўказанне куратара забіраў буйныя партыі “тавара”, фасаваў на больш дробныя, а пасля распаўсюджваў праз закладкі” на тэрыторыі абласнога цэнтра.

Пры маладым чалавеку, у схованках, а таксама па месцы жыхарства знойдзены і выняты кілаграм “асабліва небяспечнага псіхатропнага рэчыва 4-СМС”.

Паведамляецца, што замежнік займаўся гэтым менш за месяц. Цяпер, адзначае МУС, яму пагражае да 20 гадоў пазбаўлення волі “за незаконны абарот наркотыкаў з мэтай збыту”.

28 студзеня Следчы камітэт паведаміў пра затрыманне ў Рагачове (Гомельская вобласць) 46-гадовага замежніка з 400 грамамі сінтэтычнага псіхастымулятара альфа-PVP.

За першую палову 2025 года колькасць асуджаных паводле “антынаркатычных” артыкулаў Крымінальнага кодэкса (327–332) павялічылася на 2,9% у параўнанні з адпаведным перыядам папярэдняга года, вынікае з даных Вярхоўнага суда.

У студзені — чэрвені за злачынствы, звязаныя з незаконным абаротам наркотыкаў, асуджана 1.092 чалавекі, за першую палову 2024-га — 1.061.

З гэтай колькасці паводле арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў) асуджана 1.005 чалавек, або 92% (за той жа перыяд папярэдняга года — 1.011, або 95,3%).

На падставе першай частцы згаданага артыкула вінаватымі прызнана 645 асоб (64,2% асуджаных паводле арт. 328). З іх да абмежавання волі прыгаворана 442, да пазбаўлення волі — 79, арышту — 34, аштрафавана — тры.