Прадстаўнікі дэмсіл абмеркавалі ў офісе амбудсмэна Украіны сітуацыю з правамі чалавека ў Беларусі

3 лютага, Позірк. Дэмакратычным сілам Беларусі “вельмі важна наладзіць прамое і сістэматычнае супрацоўніцтва з украінскімі праваабарончымі інстытутамі”. Пра гэта заявіў юрыдычны дарадца Святланы Ціханоўскай Леанід Марозаў па выніках сустрэчы 3 лютага прадстаўнікоў дэмсіл і сакратарыята амбудсмэна Украіны.

Як паведамляе прэс-служба Ціханоўскай, бакі абмеркавалі сітуацыю з правамі чалавека ў Беларусі, надаўшы “асаблівую ўвагу становішчу палітычных зняволеных, якія незаконна ўтрымліваюцца ў месцах пазбаўлення волі на тэрыторыі Беларусі (сярод іх ёсць і грамадзяне Украіны)”.

Апроч таго, абмяркоўвалася сітуацыя беларусаў, якія зазналі пераслед за “апазіцыю да рэжымаў Аляксандра Лукашэнкі і Уладзіміра Пуціна ад пачатку поўнамаштабнай агрэсіі Расіі супраць Украіны”, а таксама “гуманітарны і праваабарончы падыход да такіх выпадкаў”.

Сярод узнятых тэм таксама былі пытанні “гвалтоўнай дэпартацыі беларускіх палітычных зняволеных з Беларусі ў 2025 годзе, у тым ліку праз тэрыторыю Украіны, і магчымая каардынацыя дзеянняў у выпадку працягу такой практыкі”.

На думку Марозава, “гаворка ідзе не толькі пра салідарнасць, але і пра канкрэтныя механізмы рэагавання — у дачыненні да палітычных зняволеных, трансгранічных рэпрэсій і прымусовых перамяшчэнняў”.

У гэтых пытаннях, лічыць ён, “ключавое значэнне мае каардынацыя з Упраўленнем упаўнаважанага па правах чалавека Украіны”.

Акрамя Марозава, у сустрэчы бралі ўдзел прадстаўніца па сацыяльнай палітыцы Аб’яднанага пераходнага кабінета Вольга Зазулінская і прадстаўніца дэмсіл ва Украіне Святлана Шаціліна.

13 снежня 2025 года ў рамках дамоўленасцей паміж Мінскам і Вашынгтонам Аляксандр Лукашэнка вызваліў 123 чалавекі (110 грамадзян Беларусі і 13 іншаземцаў) з умовай іх наступнага ад’езду з краіны.

109 беларусаў і 5 украінцаў прыбылі на тэрыторыю Украіны праз пункты пропуску Новая Гута / Новыя Ярылавічы, праз якія Украіна і Расія звычайна праводзяць абмен палоннымі. Пазней большасць беларусаў выехала ў Польшчу, палітыкі Віктар Бабарыка і Марыя Калеснікава — у Германію.

Яшчэ адзін палітвязень, лаўрэат Нобелеўскай прэміі міру, кіраўнік праваабарончага цэнтра “Вясна” Алесь Бяляцкі быў высланы ў Літву.