Шуневіч назваў правальным першы за многія гады сезон палявання на рысь — здабыта ўсяго шэсць асобін

4 лютага, Позірк. З 57 асобін рысі, адведзеных для паляўнічай здабычы ў мінулым сезоне, упалявана ўсяго шэсць (10,5%), паведаміў дзяржСМІ старшыня Беларускага таварыства паляўнічых і рыбаловаў (БТПР), былы міністр унутраных спраў Ігар Шуневіч.

“З рыссю сітуацыя неадназначная. Поўны правал сезона. Дазволеныя спосабы — з падыходу і з засады, без загонных паляванняў. У нас няма досведу і ўмоў для траплення рысі з сабакамі”, — панаракаў Шуневіч, адзначыўшы, што забітыя жывёлы з’явіліся “хутчэй спадарожнай здабычай”.

Ён падкрэсліў, што “ўсе асцярогі прыродаахоўнікаў пра ўплыў на папуляцыю аказаліся блефам, нагнятаннем атмасферы”. “Па факце паляванне на рысь не стала феноменам нацыянальнага палявання”, — дадаў Шуневіч.

Сезон палявання на рысь працягваўся з 31 кастрычніка 2025 года па 31 студзеня 2026-га.

Пра тое, што ўрад дазволіў паляванне на рысь, стала вядома з пастановы Савета міністраў № 233 ад 23 красавіка 2025 года. Дакументам былі ўнесеныя дапаўненні ў пастанову ад 14 чэрвеня 2018 года № 454 “Аб некаторых пытаннях палявання і вядзення паляўнічай гаспадаркі”.

Дазвол на здабычу рысі для грамадзян Беларусі і іншых краін Еўразійскага эканамічнага саюза каштуе 200 рублёў (тут і далей — мінімальны лімітавы кошт), для прадстаўнікоў іншых дзяржаў — 500.

Ахоўны статус рысі ў Чырвонай кнізе быў паніжаны пастановай Мінпрыроды № 10 ад 14 сакавіка 2025-га.

18 сакавіка 2024 года Аляксандр Лукашэнка падпісаў указ, які карэктуе правілы палявання і вядзення паляўнічай гаспадаркі.

Дакументам дазволена паляванне на мядзведзя і рысь у “асаблівым рэжыме”, які дазваляе “кантралявана рэгуляваць іх колькасць, на падставе распрацаваных Нацыянальнай акадэміяй навук Беларусі планаў кіравання папуляцыямі”.

Цяпер паляванне на рысь у Беларусі магчымае ў трох абласцях — у Віцебскай, Гомельскай і Мінскай.