На пажары ў Гродне загінула тры чалавекі — у сітуацыі разбіраецца СК (дапоўнена)

дададзеныя абзацы 5–7

7 лютага, Позірк. Целы трох чалавек знайшлі супрацоўнікі МНС пры ліквідацыі пажару ўдзень 7 лютага ў Гродне, паведамляе прэс-служба Следчага камітэта.

Згодна з інфармацыяй ведамства, цяпер высвятляюцца асобы загінулых. Паводле папярэдніх даных, адна з ахвяр — уладальнік жылля.

На месцы здарэння працуе следча-аператыўная група. Следчы разам са спецыялістамі абласнога ўпраўлення Дзяржкамітэта судовых экспертыз і МНС праводзіць “агляд месца здарэння, фіксуецца следавая карціна”.

“Суседзі паведамілі, што гаспадар кватэры злоўжываў спіртным. Каля паўгода з ім пражываў брат, і з гэтага часу яны рэгулярна ўжывалі алкаголь. Летась увосені ў кватэру ўжо выязджалі ратавальнікі: тады прычынай задымлення стала пакінуты на пліце рондаль”, — заяўляе СК.

Прэс-служба МНС паведаміла, што пажар адбыўся ў кватэры на першым паверсе пяціпавярховага дома на вул. Фолюш.

З сумежных і размешчаных вышэй за ачаг узгарання кватэр пажарныя выратавалі пецярых чалавек, у тым ліку дваіх дзяцей. Адзначаецца, што “пасля агляду медыкі шпіталізавалі чатырохмесячнага малога, астатнім выратаваным меддапамога не спатрэбілася”.

“З пад’езда ратавальнікі эвакуявалі 12 чалавек. Шпіталізацыя спатрэбілася 76-гадовай пенсіянерцы. Работнікі МНС ліквідавалі пажар. Пасля праветрывання жыхары змаглі вярнуцца ў кватэры. На месцы здарэння працавала 10 адзінак тэхнікі МНС”, — гаворыцца ў паведамленні.