Канькабежка Зуева: Было неверагодным, што я атрымала нейтральны статус і адабралася на Алімпіяду
8 лютага, Позірк. На стартаваўшых Алімпійскіх гульнях “трэба працягваць рабіць сваю справу і засяродзіцца на сабе”, заявіла беларуская канькабежка Марына Зуева пасля першага забегу (3.000 м, 15-е месца).
“Спачатку было неверагодным тое, што я атрымала гэты нейтральны статус. Для мяне было гэта вельмі дзіўна, і я вельмі натхнілася, трэніравалася старанна. Затым тое, што я адабралася на Алімпіяду, таксама было неверагодна, таму што вынікі на доўгіх дыстанцыях моцна прагрэсавалі. На першых двух этапах Кубках свету на вышыні я ведала, што адбяруся, таму што дастаткова добрыя секунды дэманстравала. Цяпер засяроджуся на 5.000 м”, — цытуе Зуеву прэс-служба Нацыянальнага алімпійскага камітэта.
Паводле слоў спартсменкі, яна “незадаволеная” сваім вынікам на дыстанцыі 3.000 м. “Мне падабалася ўсе апошнія дні, як усё выглядала на лёдзе, якія секунды паказвала. А сёння не ўдалося прабегчы на той час, на які разлічвала. Можа быць, адыграла ролю тое, што я дастаткова перахвалявалася, заўзятараў шмат”, — адзначыла Зуева.
Напярэдадні выступлення на Алімпіядзе пачала таксама лыжніца Ганна Каралёва. Яна заняла 34-е месца ў скіятлоне (гонка 10 + 10 км двума стылямі — класічным і свабодным).
21 студзеня стала вядома, што беларускія спартсмены атрымалі сем ліцэнзій на ўдзел у зімовай Алімпіядзе.
У склад беларускай зборнай, якая выступае ў нейтральным статусе, увайшлі Марыя Шканава (гарналыжны спорт), Марына Зуева (канькабежны спорт), Ганна Каралёва (лыжныя гонкі), Вікторыя Сафонава (фігурнае катанне), а таксама Анастасія Андрыянава, Ганна Гуськова і Ганна Дзяруга (фрыстайл).
28 жніўня 2025 года паведамлялася, што ў Алімпіядзе не змогуць узяць удзел біятланісты з Беларусі і РФ.
Летась 21 кастрычніка Міжнародная федэрацыя лыжнага спорту і сноўборда (FIS) не дапусціла беларускіх і расійскіх спартсменаў да кваліфікацыйных алімпійскіх спаборніцтваў пад сваёй эгідай. Пад эгідай FIS праводзяцца спаборніцтвы па лыжных гонках, горных лыжах, фрыстайле і сноўбордзе.
Гэтае рашэнне было апратэставанае беларускім бокам у Спартыўным арбітражным судзе ў Лазане (CAS). 2 снежня CAS абвясціў пра частковае задавальненне апеляцыі. У выніку пасля праверкі на нейтральнасць кваліфікацыю на Алімпіяду паспяхова прайшлі Гуськова, Каралёва і Шканава.
20 снежня 2024 года Міжнародны саюз канькабежцаў дазволіў нейтральным атлетам з Беларусі ўдзельнічаць у адборы на Алімпіяду, прыняўшы шэраг абмежаванняў. У рамках гэтага рашэння на Алімпійскія гульні кваліфікаваліся Зуева і Сафонава.
Зімовыя Алімпійскія гульні праходзяць 6–22 лютага 2026 года ў італьянскіх гарадах Мілан і Карціна-д’Ампеца.
На летняй Алімпіядзе-2024 у Парыжы беларускія атлеты (17 чалавек), якія выступалі ў нейтральным статусе, заваявалі чатыры медалі — залаты, два срэбныя і бронзавы, заняўшы 50-е месца ў неафіцыйным заліку.
Афіцыйны Мінск падтрымлівае Маскву ў развязанай ёю ў лютым 2022 года агрэсіі ў дачыненні да Украіны.
