У мінскім аэрапорце ўтрымліваюць групу замежнікаў, “груба з імі абыходзяцца” — СМІ

8 лютага, Позірк. У Нацыянальным аэрапорце Мінск без тлумачэння прычын ужо больш за 13 гадзін утрымліваюць групу замежнікаў, паведамляе тэлеканал “Белсат”.

“Людзям нічога не тлумачаць і груба з імі абыходзяцца”, — гаворыцца ў публікацыі.

Са спасылкай на ўласныя крыніцы інфармацыі тэлеканал паведамляе, што сярод тых, каго утрымліваюць, — “грамадзянін Расіі, спартсмен з Гаіці, грамадзяніне Узбекістана, Таджыкістана, Арменіі, Бангладэш”.

“На пашпартным кантролі іх проста не пусцілі далей, хоць некаторыя з іх ужо бывалі ў Беларусі. Спачатку замежнікам сказалі, што ўсё будзе добра, і будзе далейшая праверка, аднак потым іх проста пакінулі чакаць у асобным памяшканні без якіх-небудзь тлумачэнняў”, — адзначаецца ў паведамленні.

Сцвярджаецца, што замежнікі ўвесь гэта час застаюцца “без ежы”, а “пітная вада з кулера, які ім даступны, брудная”.

Таксама яны “скардзяцца на грубае абыходжанне з імі, у прыватнасці, на просьбу даць цукар да гарбаты былі абразы”.

Нацыянальны аэрапорт Мінск аб утрыманні замежных грамадзян не паведамляў.