У ноч на 16 лютага ў польскую паветраную прастору зноў уварваліся кантрабандныя аэрастаты
16 лютага, Позірк. У ноч на 16 лютага 2026 года вайсковыя радыёлакацыйныя сістэмы “зафіксавалі чарговыя ўлёты ў польскую паветраную прастору з боку Беларусі аб’ектаў, якія паводле характарыстык нагадваюць паветраныя шары”, паведамляе Аператыўнае камандаванне родаў Узброеных сіл Польшчы.
Адзначаецца, што “аб’екты ідэнтыфікаваліся ў рэжыме рэальнага часу і знаходзіліся пад назіраннем вайсковых сістэм выведкі”. “Сітуацыя кантралявалася і не несла пагрозы для бяспекі паветранага руху і для грамадзян Рэспублікі Польшча. Зафіксаваныя парушэнні паветранай прасторы не адрозніваліся ад інцыдэнтаў, якія назіраліся апошнім часам у раёне польска-беларускай мяжы”, — гаворыцца ў паведамленні.
З канца мінулага месяца Польшча зафіксавала шэсць серый парушэнняў паветранай прасторы з боку Беларусі (28 студзеня, 31 студзеня, 1 лютага і 2 лютага польскія вайскоўцы адразу пазначалі напрамкі руху; 4 лютага і 9 лютага пра кірунак пасля заяўлялі чыноўнікі). Ва ўсіх гэтых выпадках у аб’ектах, якія ўварваліся, распазнавалі аэрастаты, з дапамогай якіх дастаўляюцца кантрабандныя грузы.
22 студзеня стала вядома, што Міністэрства замежных спраў Польшчы выклікала часовага паверанага ў справах Беларусі, запатрабаваўшы тлумачэнняў наконт прылёту ў краіну 150 паветраных шароў у ноч на 17 студзеня.
2 лютага Памежная ахова Польшчы паведаміла, што ў студзені 2026 года ў краіне выяўлена каля 1,75 млн цыгарэт, дастаўленых з Беларусі з дапамогай паветраных шароў. Кошт канфіскаванага тавару ацэньваецца прыкладна ў 1,78 млн злотых (каля 497 тыс. долараў).
Запуск метэазондаў з кантрабандай з Беларусі ў Польшчу носіць правакацыйна-кантрабандысцкую мэту, заявіў 9 лютага на прэс-канферэнцыі ў Варшаве віцэ-прэм’ер, міністр абароны Польшчы Уладзіслаў Касіняк-Камыш. “Гэта гібрыдная вайна. З аднаго боку — заробак пэўнай групы, якая мае дазвол ад Беларусі на кантрабанду, з другога боку — спроба заспець знянацку і пасеяць непакой”, — сказаў ён.
Паводле слоў міністра, тое, што адбываецца, ажыццяўляецца альбо беларускімі службамі, альбо пры іх падтрымцы.
13 лютага памежная служба паведаміла пра затрыманне васьмі чалавек, якія, як сцвярджалася, займаліся кантрабандай цыгарэт з Беларусі з дапамогай паветраных шароў.
