Другую ноч запар Польшча назірала ўварванне паветраных шароў з тэрыторыі Беларусі

17 лютага, Позірк. Пра чарговыя “ўлёты ў польскую паветраную прастору з боку Беларусі аб’ектаў, якія паводле характарыстык нагадваюць паветраныя шары”, паведаміла Аператыўнае камандаванне радоў Узброеных сіл Польшчы.

Як і суткамі раней, запушчаныя ў ноч на 17 лютага аб’екты “ідэнтыфікаваліся ў рэжыме рэальнага часу і знаходзіліся пад назіраннем вайсковых сістэм выведкі”. “Сітуацыя кантралявалася і не несла пагрозы для бяспекі паветранага руху і для грамадзян Рэспублікі Польшча. Зафіксаваныя парушэнні паветранай прасторы не адрозніваліся ад інцыдэнтаў, якія назіраліся апошнім часам у раёне польска-беларускай мяжы”, — гаворыцца ў паведамленні.

Пры гэтым адзначаецца, што Аператыўнае камандаванне “супрацоўнічае са службамі, адказнымі за бяспеку дзяржавы, рэгулярна перадаючы неабходную інфармацыю, якая дазваляе хутка рэагаваць, у тым ліку перахапляць аб’екты і затрымліваць асоб, якія падазраюцца ва ўдзеле ў гэтых інцыдэнтах”.

Такім чынам, з канца мінулага месяца Польшча зафіксавала восем серый парушэнняў паветранай прасторы з боку Беларусі (28 студзеня, 31 студзеня, 1 лютага і 2 лютага польскія вайскоўцы ад пачатку пазначалі напрамкі руху; 4 лютага і 9 лютага пра кірунак пасля заяўлялі чыноўнікі). Ва ўсіх гэтых выпадках у аб’ектах, што ўварваліся, распазнавалі аэрастаты, з дапамогай якіх дастаўляюцца кантрабандныя грузы.

22 студзеня стала вядома, што Міністэрства замежных спраў Польшчы выклікала часовага паверанага ў справах Беларусі, запатрабаваўшы тлумачэнняў наконт прылёту ў краіну 150 паветраных шароў у ноч на 17 студзеня.

2 лютага Памежная ахова Польшчы паведаміла, што ў студзені 2026 года ў краіне выяўлена каля 1,75 млн цыгарэт, дастаўленых з Беларусі з дапамогай паветраных шароў. Кошт канфіскаванага тавару ацэньваецца прыкладна ў 1,78 млн злотых (каля 497 тыс. долараў).

Запуск метэазондаў з кантрабандай з Беларусі ў Польшчу носіць правакацыйна-кантрабандысцкую мэту, заявіў 9 лютага на прэс-канферэнцыі ў Варшаве віцэ-прэм’ер, міністр абароны Польшчы Уладзіслаў Касіняк-Камыш. “Гэта гібрыдная вайна. З аднаго боку — заробак пэўнай групы, якая мае дазвол ад Беларусі на кантрабанду, з другога боку — спроба заспець знянацку і ​​пасеяць непакой”, — сказаў ён.

Паводле слоў міністра, тое, што адбываецца, ажыццяўляецца альбо беларускімі службамі, альбо пры іх падтрымцы.

13 лютага памежная служба паведаміла пра затрыманне васьмі чалавек, якія, як сцвярджалася, займаліся кантрабандай цыгарэт з Беларусі з дапамогай паветраных шароў.

З 15 лютага ў Беларусі фіксуецца ў асноўным паўночна-ўсходні, усходні вецер.