Польшча вярнула ў Літву беларуса, які нелегальна знаходзіўся ў краіне

26 лютага, Позірк. Польшча вярнула ў Літву беларуса, які нелегальна знаходзіўся ў краіне.

25 лютага супрацоўнікі заставы памежнай аховы ў Лескаўскім павеце Падкарпацкага ваяводства недалёка ад мяжы з Украінай падчас праверкі дакументаў грамадзяніна Беларусі выявілі, што ён знаходзіўся ў краіне нелегальна.

Паведамляецца, што беларус падаў у Польшчы хадайніцтва аб наданні міжнароднай абароны, аднак кіраўнік Упраўлення па справах замежнікаў спыніў вытворчасць па справе з прычыны “дзеяння працэдуры Dublin III“.

Тлумачыцца, што “ў адпаведнасці з правам ЕС заяву разглядае першая дзяржава-член, мяжу якога перасёк іншаземец, які хадайнічае аб абароне. У выпадку гэтага беларуса такой дзяржавай з’яўляецца Літва”.

“Мужчына быў затрыманы і пад канвоем супрацоўнікаў Бешчадскага аддзела памежнай аховы дастаўлены да польска-літоўскай мяжы“, — гаворыцца ў паведамленні.

За 2025 год польская памежная служба перадала ў іншыя краіны 14 грамадзян Беларусі, якія хадайнічалі аб міжнароднай абароне ў Польшчы, і прыняла 48 беларусаў, якія прасілі прытулку ў іншых краінах, дзейнічаючы згодна з Дублінскім рэгламентам.

Паводле гэтай працэдуры з Польшчы ў Літву хацелі дэпартаваць маці беларускай тэлевядучай Кацярыны Ваданосавай. Рашэнне было аспрэчана ў судзе. У кастрычніку 2025 года адміністрацыйны суд Варшавы стаў на бок заяўніцы, улічваючы індывідуальныя абставіны — узрост, стан здароўя, а таксама тое, што адзіныя блізкія пражываюць у Беластоку. Нэлі Ваданосава змагла застацца ў Польшчы. 26 снежня 2025 года ў яе здарыўся інсульт. 2 студзеня 2026 года Ваданосава-старэйшая памерла.