У спіс “экстрэмістаў” дададзеныя 33 чалавекі

27 лютага, Позірк. 33 чалавекі дадало Міністэрства ўнутраных спраў 27 лютага ў “спіс асоб, якія маюць дачыненне да экстрэмісцкай дзейнасці”, цяпер у пераліку на сайце ведамства 6.353 пазіцыі.

У спісе пяць чалавек, якіх беларуская праваабарончая супольнасць прызнае палітвязнямі, верагодна, яны асуджаныя па справе “Беларускага Гаюна” (361⁴ Крымінальнага кодэкса).

З адзнакай “адбывае пакаранне“ пералік папоўнілі палітвязні Валерый Хацкевіч (3 гады агульнага рэжыму) і Павел Вераскоўскі (4 гады ўзмоцненага рэжыму, таксама ўказаны арт. 342 КК).

Яшчэ трое палітвязняў унесеныя ў спіс з адзнакай “судзімасць не пагашаная“, што, як правіла, сведчыць аб вынясенні прысуду, не звязанага з пазбаўленнем волі. Гаворка пра Ірыну Мініх, Віталію Выпражкіне і Наталлю Бачурынскую.

Пры гэтым Бачурынская, паводле інфармацыі праваабаронцаў, 13 студзеня 2026 года была асуджаная Брэсцкім абласным судом на 3 гады пазбаўлення волі паводле арт. 361⁴ КК.

З пазнакай “адбывае пакаранне “ў спіс экстрэмістаў” унесеныя асуджаныя паводле арт. 361⁴ Аляксандр Сідарэвіч, Уладзімір Дзенісенка, Аляксандр Віткоўскі, Аляксей Чарэшнеў, Андрэй Коваль, Аляксей Мацукевіч, Іван Петраневіч, Ігар Дзегцяронак, Юрый Анісаў і Дзмітрый Кандрусёў (таксама паводле арт. 342 КК).

Андрэй Пісарык, які адбывае пакаранне, асуджаны паводле арт. 361² КК, Дзяніс Дзенісенка — арт. 293 КК, Дзмітрый Каліноўскі — арт. 361 КК, Уладзімір Магронаў — 361¹ КК.

Таксама адбываюць пакаранне Уладзіслаў Варонін, асуджаны паводле арт. 361¹, 130, 130¹, 203¹, 289¹, 290⁴, 339, 13, 343¹, 367 і 369¹; Вячаслаў Бандарчук і Арцём Аліфяровіч — 361¹, 130¹, 130, 339, 13 і 368. Усе трое асуджаныя Гомельскім абласным судом па справе супольнасці “Дух Русі”.

З адзнакай “судзімасць не пагашаная” ў “спіс экстрэмістаў” унесеныя асуджаныя паводле арт. 361⁴ Павел Кніга, Аляксандр Леановіч, Андрэй Ільюшчанка, Андрэй Пашкевіч, Аліна Смерчынская, Аляксей Гарошка, Дзмітрый Каваленка, Павел Марозаў, Павел Баярын і Вольга Корбут (таксама паводле арт. 368 КК).

Унесены ў спіс Міхаіл Кароль, як вынікае з запісу на партале МУС, вызвалены ад адказнасці ў сувязі са сканчэннем тэрмінаў прыцягнення паводле арт. 361⁴ КК.

Беларускі рэжым рэгулярна папаўняе спісы “экстрэмістаў” і “тэрарыстаў”, “экстрэмісцкіх фарміраванняў” і інфармацыйнай прадукцыі, закладваючы “аснову для працягу дзяржаўнага тэрору і рэпрэсій”, адзначалася ў студзеньскім дакладзе праваабарончага цэнтра “Вясна”.

Даведка “Позірку”:

арт. 13 КК — падрыхтоўка да злачынства;

арт. 130 — распальванне расавай, нацыянальнай, рэлігійнай альбо іншай сацыяльнай варожасці або варажнечы;

арт. 130¹ — рэабілітацыя нацызму;

арт. 203¹ — незаконныя дзеянні ў дачыненні да інфармацыі аб прыватным жыцці і персанальных даных;

арт. 289¹ — прапаганда тэрарызму;

арт. 290⁴ — стварэнне арганізацыі для ажыццяўлення тэрарыстычнай дзейнасці альбо ўдзел у ёй;

арт. 293 — масавыя беспарадкі;

арт. 339 — хуліганства;

арт. 342 — арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх;

арт. 343¹ — выраб і распаўсюджванне парнаграфічных матэрыялаў або прадметаў парнаграфічнага характару з выявай непаўналетняга;

арт. 361 — заклікі да мер абмежавальнага характару (санкцый) , іншых дзеянняў, накіраваных на прычыненне шкоды нацыянальнай бяспецы Рэспублікі Беларусь;

арт. 361¹ — стварэнне экстрэмісцкага фарміравання альбо ўдзел у ім;

арт. 361² — фінансаванне экстрэмісцкай дзейнасці;

арт. 361⁴ — садзейнічанне экстрэмісцкай дзейнасці;

арт. 367 — паклёп у дачыненні да прэзідэнта, у тым ліку які спыніў свае паўнамоцтвы;

арт. 368 — абраза прэзідэнта, у тым ліку які спыніў свае паўнамоцтвы;

арт. 369¹ — дыскрэдытацыя Рэспублікі Беларусь.